Iran öziniñ tömen bayıtılğan uran qorın kelisim şeginen asırğanın mälimdegennen keyin, AQŞ prezidenti Donal'd Tramp «Iran otpen oynap otırğanın» ayttı. Aq üyde jurnalisterdi qabıldağan Tramp AQŞ eşqaşan Irannıñ yadrolıq qaruğa qol jetkizuine jol bermeytinin qaytalay eskertti.

Aq üydiñ Iran mäselesine baylanıstı mälimdemesinde, Iran rejimi öz bağıtın özgertpeyinşe, AQŞ ükimeti Tehranğa bağıttalğan qısımdı jalğastıratının jetkizgen jäne halıqaralıq qauımdastıqtan Irannıñ bayıtılğan uran qorınıñ standartqa say keluin talap etuin swrağan. "Irandıqtar öziniñ ne istep otırğanın jäne nemen "oynap otırğanın" anıq biledi", – degen Tramp Iranğa qaratqan sözinde.

Iran düysenbi küngi mälimdemesinde, 2015 jılı özine bağıttalğan ekonomikalıq sankciyalardı toqtatu üşin Iran 6 elmen kelisimge kelgenin, alayda, AQŞ kelisimnen birjaqtı bas tartıp, sankciyanı jalğastırğanın alğa tartqan. Sonday-aq, kelisim AQŞ tarabınan bwzılğanın aytıp, tömen mölşerde bayıtılğan uran qorın kelisimniñ şeñberinen şığarğanın jetkizgen.

Irannıñ soñğı qadamına baylanıstı Tramp ükimeti naqtı qanday jauap qaytaratını belgisiz. Degenmen, tömen mölşerdegi bayıtılğan uran qorınıñ 300 kg şamasınan asuı Irannıñ yadrolıq qaruğa bir taban jaqındap qalğanın tüsindiredi. Bwl AQŞ-Iran qayşılığınıñ şarıqtau şegine de jaqın qalğanın da körsetip twr.

Älem elderin alañdatatını – qayşılıqtı şeşuge qatıstı AQŞ pen Irannıñ wstanımdarı mülde säykes kelmeydi. Uaşington men Tehran bir-biriniñ bastı wstanımdarın özgertudi talap etedi. Bwl jağday kelisimniñ mümkindigin joqqa şığarıp otır.

“The Qazaq Times”