يران ءوزىنىڭ تومەن بايىتىلعان ۋران قورىن كەلىسىم شەگىنەن اسىرعانىن مالىمدەگەننەن كەيىن، اقش پرەزيدەنتى دونالد ترامپ «يران وتپەن ويناپ وتىرعانىن» ايتتى. اق ۇيدە جۋرناليستەردى قابىلداعان ترامپ اقش ەشقاشان يراننىڭ يادرولىق قارۋعا قول جەتكىزۋىنە جول بەرمەيتىنىن قايتالاي ەسكەرتتى.

اق ءۇيدىڭ يران ماسەلەسىنە بايلانىستى مالىمدەمەسىندە، يران رەجيمى ءوز باعىتىن وزگەرتپەيىنشە، اقش ۇكىمەتى تەھرانعا باعىتتالعان قىسىمدى جالعاستىراتىنىن جەتكىزگەن جانە حالىقارالىق قاۋىمداستىقتان يراننىڭ بايىتىلعان ۋران قورىنىڭ ستاندارتقا ساي كەلۋىن تالاپ ەتۋىن سۇراعان. "يراندىقتار ءوزىنىڭ نە ىستەپ وتىرعانىن جانە نەمەن "ويناپ وتىرعانىن" انىق بىلەدى", – دەگەن ترامپ يرانعا قاراتقان سوزىندە.

يران دۇيسەنبى كۇنگى مالىمدەمەسىندە، 2015 جىلى وزىنە باعىتتالعان ەكونوميكالىق سانكتسيالاردى توقتاتۋ ءۇشىن يران 6 ەلمەن كەلىسىمگە كەلگەنىن، الايدا، اقش كەلىسىمنەن بىرجاقتى باس تارتىپ، سانكتسيانى جالعاستىرعانىن العا تارتقان. سونداي-اق، كەلىسىم اقش تارابىنان بۇزىلعانىن ايتىپ، تومەن مولشەردە بايىتىلعان ۋران قورىن كەلىسىمنىڭ شەڭبەرىنەن شىعارعانىن جەتكىزگەن.

يراننىڭ سوڭعى قادامىنا بايلانىستى ترامپ ۇكىمەتى ناقتى قانداي جاۋاپ قايتاراتىنى بەلگىسىز. دەگەنمەن، تومەن مولشەردەگى بايىتىلعان ۋران قورىنىڭ 300 كگ شاماسىنان اسۋى يراننىڭ يادرولىق قارۋعا ءبىر تابان جاقىنداپ قالعانىن تۇسىندىرەدى. بۇل اقش-يران قايشىلىعىنىڭ شارىقتاۋ شەگىنە دە جاقىن قالعانىن دا كورسەتىپ تۇر.

الەم ەلدەرىن الاڭداتاتىنى – قايشىلىقتى شەشۋگە قاتىستى اقش پەن يراننىڭ ۇستانىمدارى مۇلدە سايكەس كەلمەيدى. ۋاشينگتون مەن تەھران ءبىر-ءبىرىنىڭ باستى ۇستانىمدارىن وزگەرتۋدى تالاپ ەتەدى. بۇل جاعداي كەلىسىمنىڭ مۇمكىندىگىن جوققا شىعارىپ وتىر.

“The Qazaq Times”