Euroodaq köşbasşısın anıqtau boyınşa ötkizilgen sammit aytarlıqtay nätije bergen joq. Bwl turalı Politico basılımı habarladı.

Osığan baylanıstı Germaniya kancleri Angela Merkel': «Negizgi ümitkerler retinde aytılğan twlğalar özderine jauapkerşilik alğanın qalaymız. Bärin üylestiruge uaqıt qajet. Wsınısımız Europarlamentte köpşiliktiñ qoldauın tabuı tiis ekenin wmıtpauımız kerek. 3 şildede Europarlament basşısı saylanğanğa deyin şeşim qabıldağımız keledi. Bwl qiın bolmaq, alayda nietimiz bolsa, qolımızdan keledi», – dep mälimdedi. Franciya prezidentiniñ aytuınşa, sammit, kelissözderdiñ nätije bermeui memleketter arasındağı sayasi alauızdıq saldarınan bolıp otır. Makron sözinde: «Tağayındau isi naşar dayındaldı. Birqatar sayasatkerlerdiñ menmendigi de keri äserin tigizdi. Bwl basşılar öz sayasi müddeleriniñ arbauında qalğan. Osı mäseleni erteñge deyin şeşuge tiispiz, tabısqa jetetinimizge senimdimin», – dedi.

Basqosu 20 sağattan asa uaqıtqa jalğasqan. Odaq prezidenti anıqtalmağandıqtan, Europalıq Keñes törağası Donal'd Tusk mäjilisti kelesi künge qaldırdı. Aldağı uaqıtta Tusk Eurokomissiya basşısınıñ ornına gollandiyalıq Frans Timmermanstı qabıldamaq. Degenmsn, bwl josparğa Timmermanstıñ migranttarğa qatıstı sayasatın qwptamaytın Pol'şa, Vengriya, Çehiya, Slovakiya men Italiya qarsı.

Europalıq Keñes törağası qızmetine bolgariyalıq Kristalina Georgievanıñ, al Euroodaqtıñ sırtqı ister boyınşa Joğarğı ökili qızmetine bel'giyalıq Şarl' Mişel'diñ kandidaturaları qarastırılıp otır. Europarlament jetekşiligine germaniyalıq Manfred Veberdi saylau wsınıldı. Naqtı qorıtındı aldağı eki künde belgili bolmaq.

"The Qazaq Times"