ەۋرووداق كوشباسشىسىن انىقتاۋ بويىنشا وتكىزىلگەن سامميت ايتارلىقتاي ناتيجە بەرگەن جوق. بۇل تۋرالى Politico باسىلىمى حابارلادى.

وسىعان بايلانىستى گەرمانيا كانتسلەرى انگەلا مەركەل: «نەگىزگى ۇمىتكەرلەر رەتىندە ايتىلعان تۇلعالار وزدەرىنە جاۋاپكەرشىلىك العانىن قالايمىز. ءبارىن ۇيلەستىرۋگە ۋاقىت قاجەت. ۇسىنىسىمىز ەۋروپارلامەنتتە كوپشىلىكتىڭ قولداۋىن تابۋى ءتيىس ەكەنىن ۇمىتپاۋىمىز كەرەك. 3 شىلدەدە ەۋروپارلامەنت باسشىسى سايلانعانعا دەيىن شەشىم قابىلداعىمىز كەلەدى. بۇل قيىن بولماق، الايدا نيەتىمىز بولسا، قولىمىزدان كەلەدى»، – دەپ مالىمدەدى. فرانتسيا پرەزيدەنتىنىڭ ايتۋىنشا، سامميت، كەلىسسوزدەردىڭ ناتيجە بەرمەۋى مەملەكەتتەر اراسىنداعى ساياسي الاۋىزدىق سالدارىنان بولىپ وتىر. ماكرون سوزىندە: «تاعايىنداۋ ءىسى ناشار دايىندالدى. بىرقاتار ساياساتكەرلەردىڭ مەنمەندىگى دە كەرى اسەرىن تيگىزدى. بۇل باسشىلار ءوز ساياسي مۇددەلەرىنىڭ ارباۋىندا قالعان. وسى ماسەلەنى ەرتەڭگە دەيىن شەشۋگە ءتيىسپىز، تابىسقا جەتەتىنىمىزگە سەنىمدىمىن»، – دەدى.

باسقوسۋ 20 ساعاتتان اسا ۋاقىتقا جالعاسقان. وداق پرەزيدەنتى انىقتالماعاندىقتان، ەۋروپالىق كەڭەس توراعاسى دونالد تۋسك ءماجىلىستى كەلەسى كۇنگە قالدىردى. الداعى ۋاقىتتا تۋسك ەۋروكوميسسيا باسشىسىنىڭ ورنىنا گوللانديالىق فرانس تيممەرمانستى قابىلداماق. دەگەنمسن، بۇل جوسپارعا تيممەرمانستىڭ ميگرانتتارعا قاتىستى ساياساتىن قۇپتامايتىن پولشا، ۆەنگريا، چەحيا، سلوۆاكيا مەن يتاليا قارسى.

ەۋروپالىق كەڭەس توراعاسى قىزمەتىنە بولگاريالىق كريستالينا گەورگيەۆانىڭ، ال ەۋرووداقتىڭ سىرتقى ىستەر بويىنشا جوعارعى وكىلى قىزمەتىنە بەلگيالىق شارل ميشەلدىڭ كانديداتۋرالارى قاراستىرىلىپ وتىر. ەۋروپارلامەنت جەتەكشىلىگىنە گەرمانيالىق مانفرەد ۆەبەردى سايلاۋ ۇسىنىلدى. ناقتى قورىتىندى الداعى ەكى كۇندە بەلگىلى بولماق.

"The Qazaq Times"