Foto: https://www.souzveche.ru

Şanhay Intımaqtastıq Wyımı bwqaralıq aqparat qwraldarınıñ rölin arttıru maqsatında birneşe jobalardı qolğa almaq.

Bişkekte ötken erkin aqparat alu jäne baspasözdiñ rölin arttıru turalı ekinşi mediaforumda Qırğızstan prezidenti Sooronbay Jeenbekov: «Memleketter arasındağı senim men özara qwrmet atmosferasın jasau ŞIW-nıñ bastı mindetteriniñ qatarında. Oğan jetu üşin BAQ-tıñ atqaratın röli öte mañızdı. Atap aytqanda, aşıq dialog qwrıp, özara qatınas ornatuğa septigin tigizedi. Soñğı jıldarı wyımğa qatısuşı elderdi resmi hronika ğana emes, wyımğa müşe elderdiñ tarihı, mädenieti men salt-dästüri qızıqtıradı. Köpşiliktiñ swranısın qanağattandıru üşin BAQ tilşilerine mümkindik te artıp keledi», – deydi.

2018 jılı bastalğan forum biıl Qırğızstanda wyımdastırıldı. Forum nätijesi boyınşa aldağı uaqıtta Qırğızstan tarapınan wyımnıñ ükimet basşıları arasındağı ortaq kelisimderge qol qoyu mäselesi qarastırılıp, müşe memleketter arasında birlesken konferenciyalar, biliktilikti arttıru mäselelerin qarastıru josparlanğan.

Şahay ıntımaqtastıq wyımı men Qırğızstannıñ erkin baspasözge wmtıluı küdik wyalatadı. Esteriñizde bolsa, 2018 jılı jeltoqsanda Qıtayda tuıstarı joğalıp ketken birneşe Qırğızstan azamatı prezident Sooronbay Jeenbekovten kömek swrağan. Keyinnen Qıtaydağı etnikalıq qırğızdardı qorğau komiteti qwrılıp, jağdaydıñ män-jayın halıq pen bilikke tüsindiru maqsatında jiın ötken. Mäsele oñtaylı şeşimin tappağan soñ, belsendiler Bişkek qalasındağı Birikken wlttar wyımı ğimaratınıñ aldında halıqaralıq qauımdastıq ökilderi men BWW bas hatşısı Antoniu Guterreşten Qıtayda qısım körip jatqan qırğız-qazaq wlttarına araşa swradı. Osı mäseleni aşıq jariyalağan qırğız jurnalisin Qırğızstan biligi qamauğa alıp, baspasözdegi erkindikke kezekti märte keri qadam jasadı. Keyinnen bir top qırğızstandıq tilşiler qamauğa alınğan jurnaliske bas bostandığın talap etip, ükimetke ün tastağan.

Jalpı alğanda, Qıtaydağı az wlttardıñ jergilikti bilik tarapınan qısım körip jatqandığı jöninde osığan deyin halıqaralıq BAQ betterinde san märte aytılıp keledi. Resmi Beyjiñ özine tağılğan ayıptardıñ barlığın joqqa şığarıp, sayasi üyrenu ortalıqtarındağı adamdardıñ barlığı öz erkimen barğandığın alğa tartıp keledi. Boljam boyınşa, qazirgi tañda Qıtaydağı sayasi üyrenu lager'lerinde bir millionğa juıq adam bar.

Qıtay ükimeti twrğındarına Facebook, YouTube, Whatsapp sındı halıqaralıq mobil'di qosımşalardı qoldanuğa tübegeyli şekteu qoyıp, täuelsiz aqparattıñ joqtığın däleldep keledi. Osı rette "baspasözi şektelgen memleket basqalarğa qanday erkindikti üyretpek?" - degen saual tuındaydı.

"The Qazaq Times"