شىۇ ەركىن ءباسپاسوزدىڭ ءرولىن ارتتىرماق

شانحاي ىنتىماقتاستىق ۇيىمى بۇقارالىق اقپارات قۇرالدارىنىڭ ءرولىن ارتتىرۋ ماقساتىندا بىرنەشە جوبالاردى قولعا الماق.

بىشكەكتە وتكەن ەركىن اقپارات الۋ جانە ءباسپاسوزدىڭ ءرولىن ارتتىرۋ تۋرالى ەكىنشى مەديافورۋمدا قىرعىزستان پرەزيدەنتى سوورونباي جەەنبەكوۆ: «مەملەكەتتەر اراسىنداعى سەنىم مەن ءوزارا قۇرمەت اتموسفەراسىن جاساۋ شىۇ-نىڭ باستى مىندەتتەرىنىڭ قاتارىندا. وعان جەتۋ ءۇشىن باق-تىڭ اتقاراتىن ءرولى وتە ماڭىزدى. اتاپ ايتقاندا، اشىق ديالوگ قۇرىپ، ءوزارا قاتىناس ورناتۋعا سەپتىگىن تيگىزەدى. سوڭعى جىلدارى ۇيىمعا قاتىسۋشى ەلدەردى رەسمي حرونيكا عانا ەمەس، ۇيىمعا مۇشە ەلدەردىڭ تاريحى، مادەنيەتى مەن سالت-ءداستۇرى قىزىقتىرادى. كوپشىلىكتىڭ سۇرانىسىن قاناعاتتاندىرۋ ءۇشىن باق تىلشىلەرىنە مۇمكىندىك تە ارتىپ كەلەدى»، – دەيدى.

2018 جىلى باستالعان فورۋم بيىل قىرعىزستاندا ۇيىمداستىرىلدى. فورۋم ناتيجەسى بويىنشا الداعى ۋاقىتتا قىرعىزستان تاراپىنان ۇيىمنىڭ ۇكىمەت باسشىلارى اراسىنداعى ورتاق كەلىسىمدەرگە قول قويۋ ماسەلەسى قاراستىرىلىپ، مۇشە مەملەكەتتەر اراسىندا بىرلەسكەن كونفەرەنتسيالار، بىلىكتىلىكتى ارتتىرۋ ماسەلەلەرىن قاراستىرۋ جوسپارلانعان.

شاحاي ىنتىماقتاستىق ۇيىمى مەن قىرعىزستاننىڭ ەركىن باسپاسوزگە ۇمتىلۋى كۇدىك ۇيالاتادى. ەستەرىڭىزدە بولسا، 2018 جىلى جەلتوقساندا قىتايدا تۋىستارى جوعالىپ كەتكەن بىرنەشە قىرعىزستان ازاماتى پرەزيدەنت سوورونباي جەەنبەكوۆتەن كومەك سۇراعان. كەيىننەن قىتايداعى ەتنيكالىق قىرعىزداردى قورعاۋ كوميتەتى قۇرىلىپ، جاعدايدىڭ ءمان-جايىن حالىق پەن بيلىككە ءتۇسىندىرۋ ماقساتىندا جيىن وتكەن. ماسەلە وڭتايلى شەشىمىن تاپپاعان سوڭ، بەلسەندىلەر بىشكەك قالاسىنداعى بىرىككەن ۇلتتار ۇيىمى عيماراتىنىڭ الدىندا حالىقارالىق قاۋىمداستىق وكىلدەرى مەن بۇۇ باس حاتشىسى انتونيۋ گۋتەررەشتەن قىتايدا قىسىم كورىپ جاتقان قىرعىز-قازاق ۇلتتارىنا اراشا سۇرادى. وسى ماسەلەنى اشىق جاريالاعان قىرعىز ءجۋرناليسىن قىرعىزستان بيلىگى قاماۋعا الىپ، باسپاسوزدەگى ەركىندىككە كەزەكتى مارتە كەرى قادام جاسادى. كەيىننەن ءبىر توپ قىرعىزستاندىق تىلشىلەر قاماۋعا الىنعان جۋرناليسكە باس بوستاندىعىن تالاپ ەتىپ، ۇكىمەتكە ءۇن تاستاعان.

جالپى العاندا، قىتايداعى از ۇلتتاردىڭ جەرگىلىكتى بيلىك تاراپىنان قىسىم كورىپ جاتقاندىعى جونىندە وسىعان دەيىن حالىقارالىق باق بەتتەرىندە سان مارتە ايتىلىپ كەلەدى. رەسمي بەيجىڭ وزىنە تاعىلعان ايىپتاردىڭ بارلىعىن جوققا شىعارىپ، ساياسي ۇيرەنۋ ورتالىقتارىنداعى ادامداردىڭ بارلىعى ءوز ەركىمەن بارعاندىعىن العا تارتىپ كەلەدى. بولجام بويىنشا، قازىرگى تاڭدا قىتايداعى ساياسي ۇيرەنۋ لاگەرلەرىندە ءبىر ميلليونعا جۋىق ادام بار.

قىتاي ۇكىمەتى تۇرعىندارىنا Facebook, YouTube, Whatsapp سىندى حالىقارالىق ءموبيلدى قوسىمشالاردى قولدانۋعا تۇبەگەيلى شەكتەۋ قويىپ، تاۋەلسىز اقپاراتتىڭ جوقتىعىن دالەلدەپ كەلەدى. وسى رەتتە ء"باسپاسوزى شەكتەلگەن مەملەكەت باسقالارعا قانداي ەركىندىكتى ۇيرەتپەك؟" - دەگەن ساۋال تۋىندايدى.

"The Qazaq Times"