Arab teñizindegi AQŞ äskeri kemeleri dayındıq üstinde. Foto: VOA.

Seysenbi küni, Tramp ükimetiniñ joğarı lauazımdı twlğaları Kongress müşelerine Irannıñ Orta Şığıstağı äskeri qaupi turalı mälimdeme jasadı. Olar ötken aptadağı Saud Arabiyasınıñ sauda kemeleri men mwnay stansalarına jasalğan şabuıldarğa Irannıñ tikeley jauapkerşiligi bar ekenin aytqan.

AQŞ prezidenti Donal'd Tramp ta düysenbi küni Iranğa qatıstı qatañ poziciyasın qaytalap, Qwrama Ştatqa qarsı qarulı äreketke barğan jağdayda Irannıñ tübegeyli joyılıp ketetinin eskertken bolatın.

Tramp sözinde: «Biz Irandı sabırmen kütemiz jäne bayqap köremiz. Biraq, olar qaşanda jaulıq äreketterin jalğastırıp keledi. Olar şın mänisinde öñirdegi terrorizmdi qoldauşı el.... Ne bolatını turalı äli naqtı şeşim joq, alayda, biz şabuılğa wşırap jatsaq, onda biz bar küşimizdi salıp auır soqqı jasaytın bolamız. Bizde odan basqa tañdau da qalmaydı», – degen.

Bwdan bwrın Iran SİM basşısı Mwhammed Zarif Tramptıñ mälimdemelerine jauap bergende: «Irandıqtar mıñdağan jıldar boyı saqtalıp keldi, al Şıñğıshan men Alkesandrdı qamtığan agressorlar joyılıp ketti», – degen bolatın. Ol jäne Irandı sıltau etip AQŞ-tıñ Parsı şığanağındağı äskeri küşterin köbeytui özdiginen apatqa jol aşadı dep eskertti. Ol Trampqa: «Söylegende basqalardı qwrmetteudi üyreniñiz, bwl paydalı», – dep te mısqıldağan.

Al, Irannıñ ruhani kösemi Ayatolla Homeyni Irannıñ soğıstı qalamaytını, alayda AQŞ-pen qaytalay kelissözge kelmeytinin mälimdegen. Ol sözinde: «Qazirgi AQŞ ükimetimen kelissözge kelu mümkin emes», – degen.

Qazir, AQŞ-tıñ Orta Şığıstağı äskeri küşteri şwğıl dayındıq üstinde. Teñiz küşteriniñ Besinşi flotı Arab teñizinde qauip-qaterge qarsı jattığulardı küşeytkenin mälimdegen.

“The Qazaq Times”