اقش يرانعا جاقىن ايماقتاردا اسكەري دايىندىقتى كۇشەيتتى

سەيسەنبى كۇنى، ترامپ ۇكىمەتىنىڭ جوعارى لاۋازىمدى تۇلعالارى كونگرەسس مۇشەلەرىنە يراننىڭ ورتا شىعىستاعى اسكەري قاۋپى تۋرالى مالىمدەمە جاسادى. ولار وتكەن اپتاداعى ساۋد ارابياسىنىڭ ساۋدا كەمەلەرى مەن مۇناي ستانسالارىنا جاسالعان شابۋىلدارعا يراننىڭ تىكەلەي جاۋاپكەرشىلىگى بار ەكەنىن ايتقان.

اقش پرەزيدەنتى دونالد ترامپ تا دۇيسەنبى كۇنى يرانعا قاتىستى قاتاڭ پوزيتسياسىن قايتالاپ، قۇراما شتاتقا قارسى قارۋلى ارەكەتكە بارعان جاعدايدا يراننىڭ تۇبەگەيلى جويىلىپ كەتەتىنىن ەسكەرتكەن بولاتىن.

ترامپ سوزىندە: «ءبىز يراندى سابىرمەن كۇتەمىز جانە بايقاپ كورەمىز. بىراق، ولار قاشاندا جاۋلىق ارەكەتتەرىن جالعاستىرىپ كەلەدى. ولار شىن مانىسىندە وڭىردەگى تەرروريزمدى قولداۋشى ەل.... نە بولاتىنى تۋرالى ءالى ناقتى شەشىم جوق، الايدا، ءبىز شابۋىلعا ۇشىراپ جاتساق، وندا ءبىز بار كۇشىمىزدى سالىپ اۋىر سوققى جاسايتىن بولامىز. بىزدە ودان باسقا تاڭداۋ دا قالمايدى»، – دەگەن.

بۇدان بۇرىن يران ءسىم باسشىسى مۇحاممەد زاريف ترامپتىڭ مالىمدەمەلەرىنە جاۋاپ بەرگەندە: «يراندىقتار مىڭداعان جىلدار بويى ساقتالىپ كەلدى، ال شىڭعىسحان مەن الكەساندردى قامتىعان اگرەسسورلار جويىلىپ كەتتى»، – دەگەن بولاتىن. ول جانە يراندى سىلتاۋ ەتىپ اقش-تىڭ پارسى شىعاناعىنداعى اسكەري كۇشتەرىن كوبەيتۋى وزدىگىنەن اپاتقا جول اشادى دەپ ەسكەرتتى. ول ترامپقا: «سويلەگەندە باسقالاردى قۇرمەتتەۋدى ۇيرەنىڭىز، بۇل پايدالى»، – دەپ تە مىسقىلداعان.

ال، يراننىڭ رۋحاني كوسەمى اياتوللا حومەيني يراننىڭ سوعىستى قالامايتىنى، الايدا اقش-پەن قايتالاي كەلىسسوزگە كەلمەيتىنىن مالىمدەگەن. ول سوزىندە: «قازىرگى اقش ۇكىمەتىمەن كەلىسسوزگە كەلۋ مۇمكىن ەمەس»، – دەگەن.

قازىر، اقش-تىڭ ورتا شىعىستاعى اسكەري كۇشتەرى شۇعىل دايىندىق ۇستىندە. تەڭىز كۇشتەرىنىڭ بەسىنشى فلوتى اراب تەڭىزىندە قاۋىپ-قاتەرگە قارسى جاتتىعۋلاردى كۇشەيتكەنىن مالىمدەگەن.

“The Qazaq Times”