Tramp Iranğa qatañ eskertuin qaytaladı. Foto: Haaretz.

Amerika Qwrama Ştattarınıñ prezidenti Iranğa qatañ eskertu jasap, Irannıñ AQŞ-qa nemese oğan tiesili nısandarğa şabuıl jasauı Irannıñ joyıluına alıp keletinin ayttı. Bwl turalı Tramp jeksenbi küni öziniñ äleumettik jelidegi paraqşasında jazdı.

Tramp «Tvitter» paraqşasında: «Eger Iran Qwrama Ştatqa şabuıl jasasa, onda ol resmi türde joyıladı», «Eşqaşan AQŞ-qa qauip töndiruge bolmaydı», – dep jazğan. Bwl mälimdemesinen üş kün bwrın, Aq üy basşısı Iranmen soğıstı qalamaytının, kelissözge dayın ekenin aytıp edi. Sol kezde Aq üyde jinalğan jurnalister Tramptan: Qwrama Ştattıñ Iranğa soğıs aşuı mümkin be? – dep swrağanda, prezident Tramp: «Men olay bolmauın qalaymın», – dep jauap bergen.

Tramptıñ Iranğa qatıstı mälimdeme jasağan kezi. Foto: VOA.

Degenmen, AQŞ pen onıñ odaqtastarı arasında Iranğa qarsı äskeri küş qoldanuı turasında pikir birligi joq. Al, Saud Arabiyasınıñ patşası Salman äs-Saud Parsı şığanağı men arab elderi basşıların 30 mamırda «agressiya jäne onıñ saldarı» taqırıbında jinalıs ötkizuge şwğıl şaqırdı.

Al, Irannıñ Revolyuciya saqşılar korpusınıñ bas qolbasşısı mälimdemesinde, Irannıñ soğıstı qalamaytın, alayda boluı mümkin «soğıstan qorıqpaytının» aytqan.

AQŞ Teñiz armiyasınıñ Besinşi flotı jeksenbi küni mälimdeme jasap, boluı mümkin qauip qaterlerge qarsı küş-quattı arttıru üşin, Arab teñizindegi jattığulardı küşeytetinin bildirdi.

AQŞ prezidentiniñ kezekti mälimdemesi soğıstıñ bolu ıqtimaldığın arttırdı. AQŞ pen Iran arasında soğıs qauipi jäne onıñ sebepteri turalı saytımızdağı kölemdi saraptamada aytılğan bolatın.  Eki eldiñ soğıstı tañdauı öñirdiñ qauipsizdigi üşin ülken qater ala keletini belgili.

“The Qazaq Times”