ترامپ: يران اقش-قا قارسى شابۋىل جاساسا، رەسمي تۇردە جويىلادى

امەريكا قۇراما شتاتتارىنىڭ پرەزيدەنتى يرانعا قاتاڭ ەسكەرتۋ جاساپ، يراننىڭ اقش-قا نەمەسە وعان تيەسىلى نىساندارعا شابۋىل جاساۋى يراننىڭ جويىلۋىنا الىپ كەلەتىنىن ايتتى. بۇل تۋرالى ترامپ جەكسەنبى كۇنى ءوزىنىڭ الەۋمەتتىك جەلىدەگى پاراقشاسىندا جازدى.

ترامپ «تۆيتتەر» پاراقشاسىندا: «ەگەر يران قۇراما شتاتقا شابۋىل جاساسا، وندا ول رەسمي تۇردە جويىلادى»، «ەشقاشان اقش-قا قاۋىپ توندىرۋگە بولمايدى»، – دەپ جازعان. بۇل مالىمدەمەسىنەن ءۇش كۇن بۇرىن، اق ءۇي باسشىسى يرانمەن سوعىستى قالامايتىنىن، كەلىسسوزگە دايىن ەكەنىن ايتىپ ەدى. سول كەزدە اق ۇيدە جينالعان جۋرناليستەر ترامپتان: قۇراما شتاتتىڭ يرانعا سوعىس اشۋى مۇمكىن بە؟ – دەپ سۇراعاندا، پرەزيدەنت ترامپ: «مەن ولاي بولماۋىن قالايمىن»، – دەپ جاۋاپ بەرگەن.

ترامپتىڭ يرانعا قاتىستى مالىمدەمە جاساعان كەزى. فوتو: VOA.

دەگەنمەن، اقش پەن ونىڭ وداقتاستارى اراسىندا يرانعا قارسى اسكەري كۇش قولدانۋى تۋراسىندا پىكىر بىرلىگى جوق. ال، ساۋد ارابياسىنىڭ پاتشاسى سالمان ءاس-ساۋد پارسى شىعاناعى مەن اراب ەلدەرى باسشىلارىن 30 مامىردا «اگرەسسيا جانە ونىڭ سالدارى» تاقىرىبىندا جينالىس وتكىزۋگە شۇعىل شاقىردى.

ال، يراننىڭ رەۆوليۋتسيا ساقشىلار كورپۋسىنىڭ باس قولباسشىسى مالىمدەمەسىندە، يراننىڭ سوعىستى قالامايتىن، الايدا بولۋى مۇمكىن «سوعىستان قورىقپايتىنىن» ايتقان.

اقش تەڭىز ارمياسىنىڭ بەسىنشى فلوتى جەكسەنبى كۇنى مالىمدەمە جاساپ، بولۋى مۇمكىن قاۋىپ قاتەرلەرگە قارسى كۇش-قۋاتتى ارتتىرۋ ءۇشىن، اراب تەڭىزىندەگى جاتتىعۋلاردى كۇشەيتەتىنىن ءبىلدىردى.

اقش پرەزيدەنتىنىڭ كەزەكتى مالىمدەمەسى سوعىستىڭ بولۋ ىقتيمالدىعىن ارتتىردى. اقش پەن يران اراسىندا سوعىس قاۋىپى جانە ونىڭ سەبەپتەرى تۋرالى سايتىمىزداعى كولەمدى ساراپتامادا ايتىلعان بولاتىن.  ەكى ەلدىڭ سوعىستى تاڭداۋى ءوڭىردىڭ قاۋىپسىزدىگى ءۇشىن ۇلكەن قاتەر الا كەلەتىنى بەلگىلى.

“The Qazaq Times”