Bir jıldan asa beybitşilik kelissözderine talpınıp kelgen Soltüstik Koreya jaña qaruın sınaqtan ötkizdi. Eldegi resmi aqparat agenttik Soltüstik Koreyanıñ «Quattı oq twmsığı bar taktikalıq qarudı» sätti sınaqtan ötkizgenin habarladı.

Bwl Pioñyañnıñ (Phen'yan) Kim Joñ Un men Tramp arasındağı kelissözder sätsiz ayaqtalğannan keyin ötkizgen alğaş retki sınağı. Äri, bwl sınaq AQŞ pen Oñtüstik Koreyanıñ birlesken äskeri jattığuınan keyin ötkizilip otır. Soltüstik Koreyanıñ resmi aqparat agenttigi bwl qaru turalı naqtı mälimet bergen joq. Alayda, amerikalıq sarapşılar, kezekti sınaqta qoldanılğan qarudıñ AQŞ-tı üreylendiretindey qwrlıqaralıq ballistikalıq zımıran emes ekenin aytqan.

«Kelissöz ötkizu üşin Tramp minezin özgertui kerek»

Pioñyañ tarabınıñ bıltır qaraşa ayındağı osığan wqsas sınağı da Uaşingtonğa körsetken qısım qatarlı bağalanğan edi.  Aqpanda V'etnamdağı Tramp-Kim sammitinen keyin AQŞ pen Soltüstik Koreya arasında yadrolıq qaru turalı turalı kelissözder toqtap twr. Jaqında KHDR-nıñ eñ joğarı basşısı Kim Joñ Un mälimdeme jasap, Soltüstik Koreya AQŞ-tıñ sankciyalarına tötep bere alatının, al kelissözderdi jalğastıru üşin Tramptıñ öz minezin özgertui kerek ekenin eskertken.

Soltüstik Koreyanıñ qwrlıq attap wşa alatın ballistikalıq zımırandarı 2017 jılğı sınaqtarda köbirek tabıstı nätijesin körsetti. Sol kezde Korey tübegi mäselesi şırqau şıñına şığıp, AQŞ pen KHDR arasında qaqtığıs boluğa az-aq qalğan. Alayda, 2018 jıl kirisimen Kim Joñ Un: «Men yadrolıq sandıqtı kelissöz üsteline alıp şığamın», – dep mälimdeme jasap, Qwrama Ştattarmen kelissözderge kele bastadı. Alayda, ekinşi ret kezdesken eki el basşıları pikir birligine kele almay, kelissöz merziminen bwrın ayaqtalıp edi. Kezekti sınaq Korey tübegi mäselesin halıqaralıq kün tärtipke qayta şığaruı mümkin.

“The Qazaq Times”