سولتۇستىك كورەيا جاڭا قارۋىن سىناقتان ءساتتى وتكىزدى. فوتو: REUTERS.

ءبىر جىلدان اسا بەيبىتشىلىك كەلىسسوزدەرىنە تالپىنىپ كەلگەن سولتۇستىك كورەيا جاڭا قارۋىن سىناقتان وتكىزدى. ەلدەگى رەسمي اقپارات اگەنتتىك سولتۇستىك كورەيانىڭ «قۋاتتى وق تۇمسىعى بار تاكتيكالىق قارۋدى» ءساتتى سىناقتان وتكىزگەنىن حابارلادى.

بۇل پيوڭياڭنىڭ (پحەنيان) كيم جوڭ ۋن مەن ترامپ اراسىنداعى كەلىسسوزدەر ءساتسىز اياقتالعاننان كەيىن وتكىزگەن العاش رەتكى سىناعى. ءارى، بۇل سىناق اقش پەن وڭتۇستىك كورەيانىڭ بىرلەسكەن اسكەري جاتتىعۋىنان كەيىن وتكىزىلىپ وتىر. سولتۇستىك كورەيانىڭ رەسمي اقپارات اگەنتتىگى بۇل قارۋ تۋرالى ناقتى مالىمەت بەرگەن جوق. الايدا، امەريكالىق ساراپشىلار، كەزەكتى سىناقتا قولدانىلعان قارۋدىڭ اقش-تى ۇرەيلەندىرەتىندەي قۇرلىقارالىق بالليستيكالىق زىمىران ەمەس ەكەنىن ايتقان.

«كەلىسسوز وتكىزۋ ءۇشىن ترامپ مىنەزىن وزگەرتۋى كەرەك»

پيوڭياڭ تارابىنىڭ بىلتىر قاراشا ايىنداعى وسىعان ۇقساس سىناعى دا ۋاشينگتونعا كورسەتكەن قىسىم قاتارلى باعالانعان ەدى.  اقپاندا ۆەتنامداعى ترامپ-كيم سامميتىنەن كەيىن اقش پەن سولتۇستىك كورەيا اراسىندا يادرولىق قارۋ تۋرالى تۋرالى كەلىسسوزدەر توقتاپ تۇر. جاقىندا كحدر-نىڭ ەڭ جوعارى باسشىسى كيم جوڭ ۋن مالىمدەمە جاساپ، سولتۇستىك كورەيا اقش-تىڭ سانكتسيالارىنا توتەپ بەرە الاتىنىن، ال كەلىسسوزدەردى جالعاستىرۋ ءۇشىن ترامپتىڭ ءوز مىنەزىن وزگەرتۋى كەرەك ەكەنىن ەسكەرتكەن.

سولتۇستىك كورەيانىڭ قۇرلىق اتتاپ ۇشا الاتىن بالليستيكالىق زىمىراندارى 2017 جىلعى سىناقتاردا كوبىرەك تابىستى ناتيجەسىن كورسەتتى. سول كەزدە كورەي تۇبەگى ماسەلەسى شىرقاۋ شىڭىنا شىعىپ، اقش پەن كحدر اراسىندا قاقتىعىس بولۋعا از-اق قالعان. الايدا، 2018 جىل كىرىسىمەن كيم جوڭ ۋن: «مەن يادرولىق ساندىقتى كەلىسسوز ۇستەلىنە الىپ شىعامىن»، – دەپ مالىمدەمە جاساپ، قۇراما شتاتتارمەن كەلىسسوزدەرگە كەلە باستادى. الايدا، ەكىنشى رەت كەزدەسكەن ەكى ەل باسشىلارى پىكىر بىرلىگىنە كەلە الماي، كەلىسسوز مەرزىمىنەن بۇرىن اياقتالىپ ەدى. كەزەكتى سىناق كورەي تۇبەگى ماسەلەسىن حالىقارالىق كۇن تارتىپكە قايتا شىعارۋى مۇمكىن.

“The Qazaq Times”