Tälipterdiñ kelissöz ökilderi. Foto: VOA.

Amerikalıq aqparat qwraldarınıñ habarlarına qarağanda, AQŞ pen Taliban küşteri dialog arqılı AQŞ äskerleriniñ Auğanstannan şeginu mäselesinde kelisimge kelgen. Bwnıñ ötemi retinde tälipter qanday da bir lañkestik wyımnıñ Auğanstandağı AQŞ pen özge elderdiñ wyımdarı men qarulı küşterine qauip töndirmeuge kepildik bergen. Bwl turalı VOA jañalıqtar qızmeti habarlağan bolatın.

Mälimetterge qarağanda, AQŞ pen tälipterdiñ kelissöz ökilderi Katarda bir apta boyı qarqındı kelissöz jürgizgen. Kelissözge Katar men Päkistannıñ ökilderi de qatısqan.

Aqparat közderiniñ (atı-jöninin bildirgisi kelmegen kelissöz ökilderiniñ) amerikalıq basılımdarğa bergen mälimetinde, eger aldağı uaqıtta barlıq is kelisim boyınşa jüzege asatın bolsa, onda bügin AQŞ Auğanstan turalı jaña jospardı resmi jariyalauğa tiis. Bwl jaña josparda Qwrama Ştat tälipterdi soğıstı toqtatuğa şaqıradı.

AQŞ-tıñ qarulı küşin Auğanstannan şegindirui men Talibannıñ soğıs toqtatuı «şekteuli jäne şarttı» türde bolmaq. Degenmen, habarlarda aytıluınşa, AQŞ prezidenti öz mälimdemesinde täliptermen kelisim turalı aşıq aytpauı da mümkin.

Bwl ret AQŞ kelissöz delegaciyasın Qwrama Ştattıñ Auğanstandağı arnayı ökili Halizad (U.S. Special Representative for Afghan Reconciliation, Khalilzad) bastap barğan. Kezekti kelissözdi AQŞ-tıñ Auğanstandağı 17 jıldıq soğısı tarihında bwrın soñdı bolmağan kelissöz retinde bağalauğa boladı.

Soñğı jıldarı Auğanstandağı jağday kürdeli bola tüsti. Süriya men Irakta jeñilis tapqan "Islam memleketi" terrorlıq wyımı auğan jerine köşe bastadı. Bwl Batıs Qıtay men Orta Aziyanı alañdattı. Auğanstanda DAIŞ soğıs bastasa bwl Ortalıq Aziya elderi üşin eñ bastı qauipke aynalatını bwğan deyin de aytılıp jür. Sondıqtan da, Auğanstan jağdayındağı qanday da bir özgeristerge nazar audaru mañızdı bolmaq.

“The Qazaq Times”