تالىپتەردىڭ كەلىسسوز وكىلدەرى. فوتو: VOA.

امەريكالىق اقپارات قۇرالدارىنىڭ حابارلارىنا قاراعاندا، اقش پەن تاليبان كۇشتەرى ديالوگ ارقىلى اقش اسكەرلەرىنىڭ اۋعانستاننان شەگىنۋ ماسەلەسىندە كەلىسىمگە كەلگەن. بۇنىڭ وتەمى رەتىندە تالىپتەر قانداي دا ءبىر لاڭكەستىك ۇيىمنىڭ اۋعانستانداعى اقش پەن وزگە ەلدەردىڭ ۇيىمدارى مەن قارۋلى كۇشتەرىنە قاۋىپ توندىرمەۋگە كەپىلدىك بەرگەن. بۇل تۋرالى VOA جاڭالىقتار قىزمەتى حابارلاعان بولاتىن.

مالىمەتتەرگە قاراعاندا، اقش پەن تالىپتەردىڭ كەلىسسوز وكىلدەرى كاتاردا ءبىر اپتا بويى قارقىندى كەلىسسوز جۇرگىزگەن. كەلىسسوزگە كاتار مەن پاكىستاننىڭ وكىلدەرى دە قاتىسقان.

اقپارات كوزدەرىنىڭ (اتى-ءجونىنىن بىلدىرگىسى كەلمەگەن كەلىسسوز وكىلدەرىنىڭ) امەريكالىق باسىلىمدارعا بەرگەن مالىمەتىندە، ەگەر الداعى ۋاقىتتا بارلىق ءىس كەلىسىم بويىنشا جۇزەگە اساتىن بولسا، وندا بۇگىن اقش اۋعانستان تۋرالى جاڭا جوسپاردى رەسمي جاريالاۋعا ءتيىس. بۇل جاڭا جوسپاردا قۇراما شتات تالىپتەردى سوعىستى توقتاتۋعا شاقىرادى.

اقش-تىڭ قارۋلى كۇشىن اۋعانستاننان شەگىندىرۋى مەن تاليباننىڭ سوعىس توقتاتۋى «شەكتەۋلى جانە شارتتى» تۇردە بولماق. دەگەنمەن، حابارلاردا ايتىلۋىنشا، اقش پرەزيدەنتى ءوز مالىمدەمەسىندە تالىپتەرمەن كەلىسىم تۋرالى اشىق ايتپاۋى دا مۇمكىن.

بۇل رەت اقش كەلىسسوز دەلەگاتسياسىن قۇراما شتاتتىڭ اۋعانستانداعى ارنايى وكىلى حاليزاد (U.S. Special Representative for Afghan Reconciliation, Khalilzad) باستاپ بارعان. كەزەكتى كەلىسسوزدى اقش-تىڭ اۋعانستانداعى 17 جىلدىق سوعىسى تاريحىندا بۇرىن سوڭدى بولماعان كەلىسسوز رەتىندە باعالاۋعا بولادى.

سوڭعى جىلدارى اۋعانستانداعى جاعداي كۇردەلى بولا ءتۇستى. ءسۇريا مەن يراكتا جەڭىلىس تاپقان "يسلام مەملەكەتى" تەررورلىق ۇيىمى اۋعان جەرىنە كوشە باستادى. بۇل باتىس قىتاي مەن ورتا ازيانى الاڭداتتى. اۋعانستاندا دايش سوعىس باستاسا بۇل ورتالىق ازيا ەلدەرى ءۇشىن ەڭ باستى قاۋىپكە اينالاتىنى بۇعان دەيىن دە ايتىلىپ ءجۇر. سوندىقتان دا، اۋعانستان جاعدايىنداعى قانداي دا ءبىر وزگەرىستەرگە نازار اۋدارۋ ماڭىزدى بولماق.

“The Qazaq Times”