CREDIT CONCEPT

Qazaqstandağı äleumettik zañ qızmeti - Antidolg.kz (Astana Hub rezidenti) onlayn-mediaciyanı damıtu maqsatında 75 mln teñge köleminde investiciya tarttı. Bwl turalı äleumettik zañ qızmetiniñ ökilderi habarladı.

Atalğan äleumettik qızmet salasına investiciya salğan - balamalı energetika jäne investiciya konsaltingi salasında jwmıs istep jürgen «M-KAT» qazaqstandıq kompaniyalar tobı.

-   Azamattıq is boyınşa sotqa tüsetin auırtpalıq jıl sayın 15 payızğa ösedi. Mısalı jılına 4 mln adam sot jüyesimen betpe-bet keledi. Sol arız-şağımdardıñ köbi kreditor kompaniyalar men jeke twlğalar arasındağı qarjı mäselesimen baylanıstı. Bwl köptegen elde sotqa jetpey-aq şeşiledi. Mine, osı närseni Antidolg.kz startapı Qazaqstanda sätti jüzege asırıp otır, - deydi «M-KAT» kompaniyalar tobınıñ negizin qalauşı äri jetekşisi Marat Ämirseyitov.

Astana Hub  basazında atalğan startap iske qosılğalı beri 3 mıñnan asa qazaqstandıq özderiniñ tüyitkildi mäselelerin şeşu üşin kompaniya kömegine jügingen. Barlıq mäsele boyınşa Antidolg.kz nätijeli jwmısqa qol jetkizgen.

- Biz narıqta türli daulı mäselelerdi mädenietti şeşudi damıta otırıp,  borışker-klienter men kreditorlardı tatulastırudı, ımıralastırudı üyrendik. Joğarı sot törağası Jaqıp Asanov mediaciyanı sot isine balama retinde damıtu kerektigi jaylı birneşe märte aytqan jäne biz narıqta onlayn qarız berip otırğan kreditor kompaniyalardıñ özi klienttermen kezdesuge baruğa dayın bolğanı üşin jäne mediaciyanı damıtu mañızdı ekenin tüsingeni üşin quanamız, - dedi Antidolg.kz bas direktorı Nwrhan İskendir.

2019 jıldıñ basında Antidolg.kz onlayn-mediaciya boyınşa Qazaqstannıñ onlayn-qarız narığında jwmıs istep jürgen iri kompaniyalarmen ıntımaqtastıqtı sätti jüzege asıra bastadı. Sonıñ arqısında qazaqstandıqtar endi kredittik qarızına qatıstı daulı mäselelerin kollektorlar men sottıñ aralasuınsız-aq şeşe aladı.

- Tartılğan investiciya tiimdi bağdarlamamen qamtamasız etudi jetildiruge jäne qızmet türin Qazaqstan men körşi elderde damıtuğa, keñeytuge jwmsaladı.  Sonday-aq, startap jwmısı tabıstı bolatınına senim bildirgen birneşe şeteldik vençurlı qorlarmen kelissöz jürgizip jatırmız. Antidolg.kz sandıq bağdarlamalardı damıtu isinde tarihta qalatın mümkindikke ie, - dedi Antidolg.kz-tiñ damıtu jönindegi direktorı Bota Jwmanova.

Onlayn-mediaciya – bwl eki taraptıñ dauına qatısı joq,  beytarap, üşinşi bir taraptıñ qatısuımen daudı retteudiñ balama forması.

Anıqtama:

Antidolg.kz – klientterge onlayn-qarızdıñ somasın negizgi qarız somasına deyin azaytuğa kömektesetin äleumettik zañ qızmeti.

«M-KAT» kompaniyalar tobı 5 bağıt boyınşa jwmıs isteydi. Sonıñ işinde investiciya konsaltingi, innovaciyalıq industriyanı damıtu jäne balama energetika sındı  bağıttar bar.

“The Qazaq Times”