قازاقستانداعى الەۋمەتتىك زاڭ قىزمەتى - Antidolg.kz (Astana Hub رەزيدەنتى) ونلاين-مەدياتسيانى دامىتۋ ماقساتىندا 75 ملن تەڭگە كولەمىندە ينۆەستيتسيا تارتتى. بۇل تۋرالى الەۋمەتتىك زاڭ قىزمەتىنىڭ وكىلدەرى حابارلادى.

اتالعان الەۋمەتتىك قىزمەت سالاسىنا ينۆەستيتسيا سالعان - بالامالى ەنەرگەتيكا جانە ينۆەستيتسيا كونسالتينگى سالاسىندا جۇمىس ىستەپ جۇرگەن «م-كات» قازاقستاندىق كومپانيالار توبى.

-   ازاماتتىق ءىس بويىنشا سوتقا تۇسەتىن اۋىرتپالىق جىل سايىن 15 پايىزعا وسەدى. مىسالى جىلىنا 4 ملن ادام سوت جۇيەسىمەن بەتپە-بەت كەلەدى. سول ارىز-شاعىمداردىڭ كوبى كرەديتور كومپانيالار مەن جەكە تۇلعالار اراسىنداعى قارجى ماسەلەسىمەن بايلانىستى. بۇل كوپتەگەن ەلدە سوتقا جەتپەي-اق شەشىلەدى. مىنە، وسى نارسەنى Antidolg.kz ستارتاپى قازاقستاندا ءساتتى جۇزەگە اسىرىپ وتىر، - دەيدى «م-كات» كومپانيالار توبىنىڭ نەگىزىن قالاۋشى ءارى جەتەكشىسى مارات امىرسەيىتوۆ.

Astana Hub  باسازىندا اتالعان ستارتاپ ىسكە قوسىلعالى بەرى 3 مىڭنان اسا قازاقستاندىق وزدەرىنىڭ تۇيىتكىلدى ماسەلەلەرىن شەشۋ ءۇشىن كومپانيا كومەگىنە جۇگىنگەن. بارلىق ماسەلە بويىنشا Antidolg.kz ناتيجەلى جۇمىسقا قول جەتكىزگەن.

- ءبىز نارىقتا ءتۇرلى داۋلى ماسەلەلەردى مادەنيەتتى شەشۋدى دامىتا وتىرىپ،  بورىشكەر-كليەنتەر مەن كرەديتورلاردى تاتۋلاستىرۋدى، ىمىرالاستىرۋدى ۇيرەندىك. جوعارى سوت توراعاسى جاقىپ اسانوۆ مەدياتسيانى سوت ىسىنە بالاما رەتىندە دامىتۋ كەرەكتىگى جايلى بىرنەشە مارتە ايتقان جانە ءبىز نارىقتا ونلاين قارىز بەرىپ وتىرعان كرەديتور كومپانيالاردىڭ ءوزى كليەنتتەرمەن كەزدەسۋگە بارۋعا دايىن بولعانى ءۇشىن جانە مەدياتسيانى دامىتۋ ماڭىزدى ەكەنىن تۇسىنگەنى ءۇشىن قۋانامىز، - دەدى Antidolg.kz باس ديرەكتورى نۇرحان ىسكەندىر.

2019 جىلدىڭ باسىندا Antidolg.kz ونلاين-مەدياتسيا بويىنشا قازاقستاننىڭ ونلاين-قارىز نارىعىندا جۇمىس ىستەپ جۇرگەن ءىرى كومپانيالارمەن ىنتىماقتاستىقتى ءساتتى جۇزەگە اسىرا باستادى. سونىڭ ارقىسىندا قازاقستاندىقتار ەندى كرەديتتىك قارىزىنا قاتىستى داۋلى ماسەلەلەرىن كوللەكتورلار مەن سوتتىڭ ارالاسۋىنسىز-اق شەشە الادى.

- تارتىلعان ينۆەستيتسيا ءتيىمدى باعدارلامامەن قامتاماسىز ەتۋدى جەتىلدىرۋگە جانە قىزمەت ءتۇرىن قازاقستان مەن كورشى ەلدەردە دامىتۋعا، كەڭەيتۋگە جۇمسالادى.  سونداي-اق، ستارتاپ جۇمىسى تابىستى بولاتىنىنا سەنىم بىلدىرگەن بىرنەشە شەتەلدىك ۆەنچۋرلى قورلارمەن كەلىسسوز جۇرگىزىپ جاتىرمىز. Antidolg.kz ساندىق باعدارلامالاردى دامىتۋ ىسىندە تاريحتا قالاتىن مۇمكىندىككە يە، - دەدى Antidolg.kz-ءتىڭ دامىتۋ جونىندەگى ديرەكتورى بوتا جۇمانوۆا.

ونلاين-مەدياتسيا – بۇل ەكى تاراپتىڭ داۋىنا قاتىسى جوق،  بەيتاراپ، ءۇشىنشى ءبىر تاراپتىڭ قاتىسۋىمەن داۋدى رەتتەۋدىڭ بالاما فورماسى.

انىقتاما:

Antidolg.kz – كليەنتتەرگە ونلاين-قارىزدىڭ سوماسىن نەگىزگى قارىز سوماسىنا دەيىن ازايتۋعا كومەكتەسەتىن الەۋمەتتىك زاڭ قىزمەتى.

«م-كات» كومپانيالار توبى 5 باعىت بويىنشا جۇمىس ىستەيدى. سونىڭ ىشىندە ينۆەستيتسيا كونسالتينگى، يننوۆاتسيالىق يندۋستريانى دامىتۋ جانە بالاما ەنەرگەتيكا سىندى  باعىتتار بار.

“The Qazaq Times”