Jıl ötken sayın halıqaralıq sayasattağı alpauıttar arasındağı alparıs küşeyip keledi. Biıl da bwl körinis küşeymese, älsiregen joq. Resey men Batıs elderi teketiresi, AQŞ pen Qıtay arasındağı sauda soğısı siyaqtı geosayasi mäseleler 2018 jılı jaña deñgeyge köterildi. Köp vektorlı sayasat wstanatın Qazaqstanğa «derjavalar arasındağı dauda» özindik tañdau jasau talabı küşeydi. Osı twsta biz resmi Astananıñ biıl sırtqı sayasatta jasağan qadamdarına qısqaşa toqtaludı jön kördik.

Sırtqı sayasattağı 2018 jıldıñ bastı oqiğası sözsiz Nwrswltan Nazarbaevtıñ AQŞ-qa saparı. 16-18 qañtar künderi Nazarbaev arağa 12 jıl salıp Uaşingtonğa resmi issaparmen bardı. Ol onda AQŞ prezidenti Donal'd Tramp pen vice-prezident Maykl Pens jäne Amerika biznes elitasımen kezdesuler ötkizdi. Kezdesuler barısında qwnı 7 milliard dollardı qwraytın 20-ğa juıq qwjatqa qol qoyıldı.

Mañızdılığı jağınan «Qazaqstan-AQŞ strategiyalıq äriptestik kelisiminen» kem tüspeytin kelesi oqiğa «Ortalıq Aziya elderi basşılarınıñ» sammiti. Naurız ayınıñ 16-ı küni Astana qalasında Qazaqstan, Özbekstan, Qırğızstan, Täjikstan basşıları men Türkimenstan mäjilis törağasınıñ qatısuımen birinşi «aymaqtıq aqıldasu» sammiti ötti. Kezdesu barısında taraptar aymaqtıq mäselelerdi özara aqıldasu arıqıl şeşuge jäne jıl sayın naurız merekesi qarsañında kezdesip twruğa uağdalastı.

Tamız ayında Aqtau qalası «Kaspiy jağalauı elderi basşılarınıñ» kezekti sammitin qabıldadı. Sammite Qazaqstan, Äzirbayjan, Türkimenstan, Resey jäne Iran basşıları Kaspiy teñizin özara böluge baylanıstı kelisimge keldi. 20 jıldıq kelissözderdiñ nätijesinde Kaspiy teñizine erekşe qwqıqtıq märtebe beretin arnayı Konvenciya qabıldandı. Jaña qwjat boyınşa, territoriyalıq su aymağı, balıq aulau aymağı jäne beytarap aymaq belgilendi. Eñ bastısı Kaspiy Kovenciyasınıñ qabıldanuımen Qazaqstan şekara bekitu procesin tolıqtay ayaqtadı. Bwdan bılay Qazaqstannıñ körşi memlekettermen eşqanday territoriyalıq dauı joq.

2018 jıl resmi Astana men Taşkent qarım-qatınasınıñ jaña deñgeyge köterilgen jılı boldı. Naurız ayında Nwrswltan Nazarbaev pen Şavkat Mirzieev «2018 jıl Qazaqstandağı Özbekstan jılı» dep jariyaladı. Özara tauar aynalımı, kölik jäne äue tasımalı jaña deñgeyge köterildi. Qos tarap sırtqı sayasatta da kelisim boyınşa qimıldadı. Nwrswltan Nazarbaevtan keyin mamır ayında AQŞ-qa resmi issaparmen Şavkat Mirzieev bardı. Osıdan keyin köptegen sarapşılar «qazaq-özbek tandemi aymaqtıq integraciyanıñ alğışarttarın jasauda» - degen boljamdar jasay bastadı.

Mamır ayında parlament AQŞ-qa Aqtau jäne Qwrıq porttarı arqılı Auğanstanğa jük tasımaldauğa mümkindik beretin zañ jobasın ratifikaciyaladı. Bwnı Kreml' mañında jürgen reseylik BAQ ökilderi satqındıqqa balap, «Qazaqstan Aqtau jäne qwrıq porttarın AQŞ äskerine jalğa berdi» - degen sarındağı aqparattardı qarşa borattı. Biraq Qazaqstannıñ Reseydigi elşiligi Resey jurnalisteri men sarapşıları taratıp jatqan aqparattardıñ barlığı jalğan ekendigin aytıp arnayı mälimdeme jasadı. Bir sözben aytqanda Qazaqstan sırtqı sayasatta özindik bağıtı men közqarası bar ekendigin bayqattı.

Bwnıñ barlığı ärine biz bayqağan, qoğam qızu talqılağan, eldiñ esinde qalğan oqiğalardıñ bir sıpırası ğana. Bwdan bölek  2018 jılı sırtqı sayasatta köptegen dünieler boldı. Biz joğarıda aytqan oqiğalardıñ barlığı sırtqı sayasattıñ jağımdı twstarı. Biraq 2018 jılı Qazaqstannıñ sırtqı sayasatta öz paydasına şeşe almağan mäseleleri de şaş etekten. Biz olardıñ barlığınıñ atın atap, tüsin tüstemey aq qoyaiıq. Biraq bir mäseleni aytpasqa bolmas. Ol - Qıtayda qısım körip jatqan etnikalıq qazaqtar mäselesi. Qıtaydağı qazaq mäselesine qatıstı sırtqı ister ministrligine, köşi-qon basqarmasına osı uaqıtqa deyin san märte hat jazıldı, arız, talap-tilek joldandı. Biraq señ ornınan qozğalmadı. SİM Qıtayğa birneşe ret nota jibergenimen resmi Beyjiñ mardımdı jauap qatpadı. Endigi ümit kelesi jılda...

"The Qazaq Times"