Türik prezidenti Haşoggi isine pikir bildirdi. Foto: REUTERS/BBC.

Saud Arabiyasınıñ oppoziciyalıq jurnalisi Haşoggidiñ öliminen keyin halıqaralıq deñgeyde diplomatiyalıq dağdarıstıñ küşeyip bara jatqanı bayqaladı. Türkiya prezidenti Rejep Tayıp Erdoğan öziniñ «Ädilet jäne damu» partiyasınıñ parlamenttegi jiınında jurnalist Haşoggidiñ ölimi turalı öz pikirin bildirdi. Ol bwl istiñ Saud ükimeti aldın ala josparlanğan türde jüzege asırğan boluı mümkin ekenin ayttı.

Türik basşısı sonday-aq, jurnalistiñ süyeginiñ qayda ekenin jäne onı atuğa kimniñ bwyrıq bergenin aytudı da talap etken. Bwl mäselede Erdoğan Saud Arabiyasınıñ korolin de ayıptau söziniñ astına aladı. Haşoggidiñ mürdesi wzaq uaqıtqa deyin tabılmay jatuınıñ özi de köp närseden derek beretinin de basa aytıp ketken.

Erdoğan söz arasında Saud patşalığınıñ taq mwrageri Mwhammed bin Salmanmen telefon arqılı söyleskenin de ayttı, äri «Konsuldıqta bolğan oqiğa turalı şırqırağan şındıqtı aytıp bere alamın», –dedi.

Osıdan keyin Türkiya SİM basşısı Mevlut Şavuşoğlu mälimdemesinde, Saud Arabiya tarabı Haşoggi ölimine baylanıstı tergeu isinde Türkiyamen selbese bastalğanı mälim boldı.

Esteriñizde bolsa, 2 qazannan beri Saud Arabiyası Haşoggi isi turalı türli nwsqadağı jauaptar berip keldi. Aqırı 22 qazan küni ğana onıñ öz elşiliginde atıp öltirilgenin moyındağan bolatın.

“The Qazaq Times”