Qıtaydağı «Änşi» telejobasınıñ törtinşi aynalımında Dimaş üşinşi orındı ielenip, kelesi aynalımğa joldama aldı. Bwl ret Dimaş qıtay tilindegi «Qoñır küz edi» attı än orındap, tıñdarmandarınıñ tağı bir märte qızu ıqılasına bölendi. "The Qazaq Times" habarlaydı.

Dimaştıñ qazir qıtayğa tanımal ekeninen qazaqstandıq jwrtşılıq tolıq habardar. Qıtay äleumettik jelilerinde ol turalı pikirlerdiñ sanına jetu mümkin emes. Qazaqstandıq jas änşiniñ tañday qaqtırar talantı men jağımdı tür-kelbeti qıtaylıq janküyerlerin esinen tandıra tabındırıp jatqanın, sol eldiñ äleumettik jelilerinen körip otırmız. Äsirese, qıtaylıq qızdar öz äleumettik jeli paraqşalarına Dimaştıñ suretin ilip, ol turalı qwlaş-qwlaş ğaşıqtıq sözderin jazu ürdiske aynalğan.

Alayda, bwğan qızğanışpen qaraytın, ol turalı jağımsız pikirlerdi jariyalauşılar da tabılıp jatır. Qazaqstanda da Dimaş turasında qızğanıştan tuğan san aluan pikirlerdiñ bolğanın körip, jat eldegi osı qatarlı pikirlerge tañdana almaymız. Qıtaydıñ Ortalıq halıq radio resmi (CNR) saytında (ent.cnr.cn) “Dimaştıñ makiyajsız fotosureti taralıp, jwrt «Änşi» jobasınıñ model'deu qabiletine tañday qaqtı” degen taqırıptağı maqala jariyalandı. (http://ent.cnr.cn/gd/20170211/t20170211_523587264.shtml)

Maqala mazmwnın qısqaşa ayta keter bolsaq, körikti bet-pişin, ädemi közder, wızın boyımen «Änşi» sahnasında jarıq ete qalğan qazaqstandıq änşi,  jwrtqa perizattay äser etti. Oğan tabınuşılar men ğaşıq bolğan qıtaylıq qızdardıñ şuılı äli de üdep twr. Alayda, jaqında Dimaştıñ äuejaydağı boyamasız sureti jariya boldı. Äleumettik jeli twtınuşıları «Änşi» tele jobasınıñ model'deu qabiletine tañday qaqtı. Dimaş jwrt oylağanday kelbetti emes, qızdardıñ esi kete tabınıp jürgen «perizattarı» jobadağı stilistterdiñ qolınan jasalğan desti. Maqalada Dimaşpen qatar jobadağı tağı birneşe änşilerdiñ atı atalğan.

Basqa emes, Qıtaydıñ bedeldi aqparat ortalığınıñ resmi saytında jariyalanğan maqala, qalayda belgili maqsatqa ökildik etip twrğanı anıq. Jobadağı öz äriptesteriniñ tapsırısı boluı da ğajap emes. Qıtay öner salasınıñ talanttı bağalauına razılıq bildiruge de boladı. Degenmen, ideologiyalıq qızmetti qalt jibermey qadağalaytın qıtay qoğamı halıq arasında  zor dümpu tudırğan jeke twlğalardı da öz nısanına alıp otıradı. Qıtaylıq janküyerlerin özine sonşa baurağan şeteldik änşige, qıtaydağı at-ataqsız änşilerdiñ işi küyeri mwnda twr.

Foto: ent.cnr.cn

«Dimaştıñ äuejaydağı boyamasız beynesi» atalıp jürgen bwl surettegi adamnıñ Dimaştıñ özi ekenine de kümän keltiruge boladı. Özi bolğan künde de körgen jerden avtograf beruge, selfi jasauğa äureleytin janküyerlerinen jaltaru üşin bwnday beynede jüruge äbden bolar. Ärine, jol sapardan şarşağan adamnıñ beynesine wqsatuğa da boladı. Bizdiñ maqalağa qarsı pikirimizsiz-aq, qıtaylıq janküyerleri maqalanı qarsı pikirmen kömip ketipti. Solardıñ arasında «eger teledidardan tüspeytin qıtaylıq änşiler betin jusa, tanımay qalar edik» degen pikirdi de kezdestirdik. Qalay dese de, Dimaş qazaqtıñ kelbetti jigitterine tän bet-beynesimen qıtaylıqtardan köri bizge jaqsı tanıs. Aldağı barlıq qadamdarına sättilik tileymiz!

“The Qazaq Times”