قىتايداعى «ءانشى» تەلەجوباسىنىڭ ءتورتىنشى اينالىمىندا ديماش ءۇشىنشى ورىندى يەلەنىپ، كەلەسى اينالىمعا جولداما الدى. بۇل رەت ديماش قىتاي تىلىندەگى «قوڭىر كۇز ەدى» اتتى ءان ورىنداپ، تىڭدارماندارىنىڭ تاعى ءبىر مارتە قىزۋ ىقىلاسىنا بولەندى. "The Qazaq Times" حابارلايدى.

ديماشتىڭ قازىر قىتايعا تانىمال ەكەنىنەن قازاقستاندىق جۇرتشىلىق تولىق حاباردار. قىتاي الەۋمەتتىك جەلىلەرىندە ول تۋرالى پىكىرلەردىڭ سانىنا جەتۋ مۇمكىن ەمەس. قازاقستاندىق جاس ءانشىنىڭ تاڭداي قاقتىرار تالانتى مەن جاعىمدى ءتۇر-كەلبەتى قىتايلىق جانكۇيەرلەرىن ەسىنەن تاندىرا تابىندىرىپ جاتقانىن، سول ەلدىڭ الەۋمەتتىك جەلىلەرىنەن كورىپ وتىرمىز. اسىرەسە، قىتايلىق قىزدار ءوز الەۋمەتتىك جەلى پاراقشالارىنا ديماشتىڭ سۋرەتىن ءىلىپ، ول تۋرالى قۇلاش-قۇلاش عاشىقتىق سوزدەرىن جازۋ ۇردىسكە اينالعان.

الايدا، بۇعان قىزعانىشپەن قارايتىن، ول تۋرالى جاعىمسىز پىكىرلەردى جاريالاۋشىلار دا تابىلىپ جاتىر. قازاقستاندا دا ديماش تۋراسىندا قىزعانىشتان تۋعان سان الۋان پىكىرلەردىڭ بولعانىن كورىپ، جات ەلدەگى وسى قاتارلى پىكىرلەرگە تاڭدانا المايمىز. قىتايدىڭ ورتالىق حالىق راديو رەسمي (CNR) سايتىندا (ent.cnr.cn) “ديماشتىڭ ماكياجسىز فوتوسۋرەتى تارالىپ، جۇرت «ءانشى» جوباسىنىڭ مودەلدەۋ قابىلەتىنە تاڭداي قاقتى” دەگەن تاقىرىپتاعى ماقالا جاريالاندى. (http://ent.cnr.cn/gd/20170211/t20170211_523587264.shtml)

ماقالا مازمۇنىن قىسقاشا ايتا كەتەر بولساق، كورىكتى بەت-ءپىشىن، ادەمى كوزدەر، ۇىزىن بويىمەن «ءانشى» ساحناسىندا جارىق ەتە قالعان قازاقستاندىق ءانشى،  جۇرتقا پەريزاتتاي اسەر ەتتى. وعان تابىنۋشىلار مەن عاشىق بولعان قىتايلىق قىزداردىڭ شۋىلى ءالى دە ۇدەپ تۇر. الايدا، جاقىندا ديماشتىڭ اۋەجايداعى بوياماسىز سۋرەتى جاريا بولدى. الەۋمەتتىك جەلى تۇتىنۋشىلارى «ءانشى» تەلە جوباسىنىڭ مودەلدەۋ قابىلەتىنە تاڭداي قاقتى. ديماش جۇرت ويلاعانداي كەلبەتتى ەمەس، قىزداردىڭ ەسى كەتە تابىنىپ جۇرگەن «پەريزاتتارى» جوباداعى ستيليستتەردىڭ قولىنان جاسالعان دەستى. ماقالادا ديماشپەن قاتار جوباداعى تاعى بىرنەشە انشىلەردىڭ اتى اتالعان.

باسقا ەمەس، قىتايدىڭ بەدەلدى اقپارات ورتالىعىنىڭ رەسمي سايتىندا جاريالانعان ماقالا، قالايدا بەلگىلى ماقساتقا وكىلدىك ەتىپ تۇرعانى انىق. جوباداعى ءوز ارىپتەستەرىنىڭ تاپسىرىسى بولۋى دا عاجاپ ەمەس. قىتاي ونەر سالاسىنىڭ تالانتتى باعالاۋىنا رازىلىق بىلدىرۋگە دە بولادى. دەگەنمەن، يدەولوگيالىق قىزمەتتى قالت جىبەرمەي قاداعالايتىن قىتاي قوعامى حالىق اراسىندا  زور ءدۇمپۋ تۋدىرعان جەكە تۇلعالاردى دا ءوز نىسانىنا الىپ وتىرادى. قىتايلىق جانكۇيەرلەرىن وزىنە سونشا باۋراعان شەتەلدىك انشىگە، قىتايداعى ات-اتاقسىز انشىلەردىڭ ءىشى كۇيەرى مۇندا تۇر.

فوتو: ent.cnr.cn

«ديماشتىڭ اۋەجايداعى بوياماسىز بەينەسى» اتالىپ جۇرگەن بۇل سۋرەتتەگى ادامنىڭ ديماشتىڭ ءوزى ەكەنىنە دە كۇمان كەلتىرۋگە بولادى. ءوزى بولعان كۇندە دە كورگەن جەردەن اۆتوگراف بەرۋگە، سەلفي جاساۋعا اۋرەلەيتىن جانكۇيەرلەرىنەن جالتارۋ ءۇشىن بۇنداي بەينەدە جۇرۋگە ابدەن بولار. ارينە، جول ساپاردان شارشاعان ادامنىڭ بەينەسىنە ۇقساتۋعا دا بولادى. ءبىزدىڭ ماقالاعا قارسى پىكىرىمىزسىز-اق، قىتايلىق جانكۇيەرلەرى ماقالانى قارسى پىكىرمەن كومىپ كەتىپتى. سولاردىڭ اراسىندا «ەگەر تەلەديداردان تۇسپەيتىن قىتايلىق انشىلەر بەتىن جۋسا، تانىماي قالار ەدىك» دەگەن پىكىردى دە كەزدەستىردىك. قالاي دەسە دە، ديماش قازاقتىڭ كەلبەتتى جىگىتتەرىنە ءتان بەت-بەينەسىمەن قىتايلىقتاردان كورى بىزگە جاقسى تانىس. الداعى بارلىق قادامدارىنا ساتتىلىك تىلەيمىز!

“The Qazaq Times”