Üştik sammit. Foto: Anadolı.

Resey men Iran qoldauındağı Başar Asad rejimine qarastı armiya köterilisşiler men jihadşılardıñ baqılauındağı Idlib aymağına şabuıl bastaydı degen sözdiñ aytılğanına eki aptaday uaqıt boldı. Biraq, Süriya armiyası äli de qarulı operaciyanı bastamay otır. Sarapşılardıñ aytuınşa, bwğan Türkiyanıñ qarsılığı sebep bolğan. Iran ortalıq qalasında Putin, Erdoğan jäne Ruhani arasında kezdesu ötkeni belgili. Üşjaqtı kelissözdiñ bastı taqırıbı – Idlib mäselesi.

Süriyadağı ükimetke qarsı küşterdiñ baqılauında tört provinciya bolğan edi. Türkiyamen şekaralas jatqan Idlib te sonıñ biri. Qalğan üşeuin Başar Asad özine qaratıp ülgerdi. Idlibke şabuıl jasauğa Türkiyanıñ qarsı bolatın sebebi köp. Aytalıq, Türkiya bwl provinciyanıñ qauipsizdigine kepilger bolğan. Onıñ üstine, türik qarulı küşteri de ornalasqan. Ankara qoldau körsetetin qarulı toptar da bar.

Türkiya Sırtqı ister ministrligi Idlib soğısı qauipsizdik pen gumanitarlıq mäselelerdi qiındatadı dep, öz alañdauşılığın bildirip keldi. Türkiyadağı üş millionnan astam süriyalıq bosqındardıñ sanı tipti de köbeyip ketuinen qattı alañdaydı. Bwl öz kezeginde Europanıñ da qorqınışı ekenin osığan deyin de aytqanbız. Üştik sammit kezinde Erdoğan: «Biz qazirdiñ özinde 3,5 mln süriyalıqtı elimizde panalatıp otırmız. Idlibtegi twrğındardıñ sanı da osımen birdey. Biz tağı 3,5 mln adamğa esigimizdi aşuğa mümkindigimiz de, küşimizde jetpes. Qazirgi bastı qadam – Idlibte boluı mümkin migraciya ağımın toqtatu», – dedi.

Osığan qosa, Ankara jağı Süriya armiyasınıñ atalğan aymaqqa jasağan şabuılı osığan deyin Türkiya armiyasınıñ jetken jetistikterin joq qıladı dep alañdaydı.  Sondıqtan Tehrandağı jinalısta da, oğan deyin de Türkiya tarabı Idlib soğısın boldırmauğa tırıstı.

Iran, Resey, Türkiya arasındağı keñeste Idlib tağdırı turalı ortaq kelisimi jasaldı. Kelisim Türkiyanıñ talabın tolıq qanağattandırdı deuge boladı.  12 taraudan twratın ortaq mälimdemede BWW-nıñ Süriya jönindegi qaulısın saqtaymız desti.  YAğni, BWW Qauipsizdik keñestiniñ №2254 qaulısı boyınşa, Süriya jerindegi barlıq qarulı operaciyalar "äl-Kaida" men DAIŞ-ke qarastı terrorlıq toptardı joyuğa bağıttaladı. Al, bosqındardıñ mekenine qayta ornalasuı üşin barlıq jağdaydı jasauğa tırısatın boldı.

Degenmen, atalğan üş eldiñ Süriya mäselesin taqırıp etip kezdesken barlıq jinalıstarınıñ qorıtındıları är türli. Osıdan bwrın Süriya isi üşin bas qosqan üş liderdiñ sammitinen keyin Türkiya özimen şekaralas Süriya jerine armiya kirgizgen bolatın. Idlib tağdırı Tehranda qanday jarğığa tüskeni aldağı uaqıtta Başar Asad armiyasınıñ qadamınan belgili bolmaq.

“The Qazaq Times”