Tramp sankciyanı küşine engizdi. Foto: voa.

AQŞ prezidenti Iranğa qaratılğan ekonomikalıq sankciyanı resmi türde küşine engizu bwyrığına qol qoydı. Prezident Donal'd Tramp bwyrıqqa qol qoyıp bolğannan keyin, Tehran (Tegeran) biligin sınay söyledi. Ol IIR rejimin «Qandı qol rejim, jendettikti jalğastıruşı, zorlıq-zombılıq jäne haos tudıruşı ükimet» dep bağaladı. Bwl turalı VOA habarlağan bolatın. 

Tramptıñ mälimdeuinşe, 5 qaraşa küni AQŞ Irannıñ energetikalıq operaciyalarına jäne Irannıñ ortalıq bankimen jwmıs isteytin şeteldik qarjı instituttarına sankciya salmaq. Ol jäne osığan deyin «Eñ soraqı kelisim» dep bağalağan Iran yadrolıq kelisimin de qaytalay ayıptap ötti. Bwl jolı atalğan kelisimdi «Qorqınıştı häm birjaqtı kelisim» dep atadı. Tramptıñ oyınşa bwl kelisim Irannıñ yadrolıq oq twmsıqtarın damıtuına mümkindik beredi, sonımen qatar, bwrınğı sankciyalardan qwtqarıp, Iran rejiminiñ teris piğıldarın iske asıruğa oray jaratıp bergen.

Tramp sözinde: «Bwrınğı kelisimge qol jetkizgennen keyin Irannıñ agressiyası küşeydi. Olar jaña qarjılandıru közderin erkin paydalana aldı. YAdrolıq sınaqtarğa qabletti zımırandardı öndirdi, terrorizmdi astırtın qarjılandırıp, Tayau-Şığıstağı jäne odan tıs aymaqtardağı qaqtığıstardı örşitti», – dedi.

Ol tağı: «Bügingi künniñ özinde, Iran Qwrama Ştattar men onıñ odaqtastarına qauip töndirip, halıqaralıq qarjı jüyesin büldirip, älemdegi terrorlıq jäne jauıngerlik agentterdi qoldap otır», – dedi.

Tramptıñ är kezdegi Iran turalı qaralauları men ayıptauları Iran ükimeti jağınan jauapsız qalğan emes. IIR prezidenti Hasan Ruhani öz kezeginde: «AQŞ – öte senimsiz el. Öytkeni, ol qol qoyılğan barlıq halıqaralıq kelisimderdi küşinen qaldırıp, älemdegi senimdilikti älsiretti», – dedi.

Izrail' prem'er-ministri Ben'yamin Netan'yahu prezident Tramptı jaña sankciyalar turalı habarlandıruımen qwttıqtağan. Netan'yahu da Trampqa  wqsas köpten beri Iran yadrolıq kelisimin sındap kelgen edi. Şın mänisinde, Irannıñ öñirdegi bastı qarsılasınıñ biri – Izrail'. Evrey biligi Irannıñ Tayau-Şığısta arta tüsken ıqpalınan qattı üreylenedi. Äsirese, Süriyanıñ Izrail'ge jaqın şekaralarında Irannıñ qarulı küşteri jäne onı qoldaytın qarulı toptar evrey jwrtına qaray jaqınday tüsken.

AQŞ ükimeti Iranğa bağıttalğan sankciya onıñ rejiminiñ sayasatın özgertip, täubesine keltiredi dep ümittenedi. Degenmen, eki el arasındağı qayşılıqtıñ qaqtığısqa wlasuınan alañdaytın elderdiñ qatarı köp. Bwl qatarğa twtas Europa elderin aytuğa boladı. Sebebi, Europanıñ köptegen aldınğı qatarlı damığan elderi Parsı şığanağınan şığatın mwnay eksportına täueldi. Ormuz bwğazınıñ qaqtığıstardan twralap qaluı Europa elderiniñ ekonomikasına auır soqqı boladı.

“The Qazaq Times”