Mäjilis deputatı Mäulen Äşimbaev. Foto: Kazpravda.kz

Qazaq müddesi men memlekettik twtastığına qauipti söz ben äreketterge batıl ün qatatın deputattıñ biri – Mäulen Äşimbaev. Mäulen Sağatwlı Parlament Mäjilisiniñ Halıqaralıq ister, qorğanıs jäne qauipsizdik komitetin basqaradı. Bwl deputattıñ qızmettik twrğıdağı mindeti ekeni de anıq, alayda onıñ azamattıq poziciyası da osı desek qatelespeymiz.

Mäsele qaydan şıqtı? Biılğı 26 qañtarda Resey Memlekettik dumasınıñ TMD isteri jönindegi komitetiniñ müşesi Pavel Şperov Memlekettik dumadağı döñgelek üstel, Qazaqstandağı orıstardı qorğaymın jäne Qazaqstan territoriyasın Resey jerine qosamın degen sıñayda pikir bidirgen bolatın. Osığan baylanıstı, Qazaqstan Sırtqı ister ministrligi de reseylik tarapqa öz poziciyasın bildirgen.

Bwl turalı keşe Parlament Mäjilisiniñ deputatı Mäulen Äşimbaev ta QR, Parlamenti atınan öziniñ nıq wstanımın bildirdi. Ol Qazaqstan men Resey dostıq qarım-qatınas jäne memlekettik şekara kelisimi negizinde baylanıs ornatqan jaqın körşi elder ekenin ayttı. Eki eldiñ türli wyımdar töñireginde tığız äriptestik ornatıp otırğanın, memleket basşılarınıñ da bir-birin qoldau, tüsinisu bağıtında jwmıs istep kele jatqanın bildirdi.

«Bwl parlamenttik jäne ükimettik deñgeydegi qarım-qatınastarğa da baylanıstı. Qazaqstan täuelsizdiginiñ 25 jıldığına oray, Resey Memlekettik Dumasınıñ törağası V.Volandinnıñ birinşi ret Qazaqstanğa resmi saparmen kelui de eki el arasındağı joğarı deñgeydegi qatınasqa joğarı mazmwn beredi. Sondıqtan, Qazaqstannıñ territoriyalıq twtastığı turalı Memlekettik Duma deputatı Şperovtıñ aytqanı aqılğa siımsız dünie. Onıñ bwl pikiri eki eldiñ tatu körşilik, dostıq baylanısına, äriptestikke qwrılğan Qazaqstan-Resey qatınasına eş say kelmeydi» dedi M.Äşimbaev.

Arı qaray, ol Qazaqstannıñ täuelsizdigi men territoriyalıq twtastığı eş özgermeytin qwndılıq ekenin, bizdiñ şekaramızdıñ halıqaralıq kelisimderge say bekitilip, twraqtalğanın ayttı. Memlekettik twtastığımızğa eşkimniñ kümän keltiruine jol berilmeydi dedi. Soğan oray, Resey Memlekettik Dumasınıñ deputattarı bwdan keyin Qazaqstannıñ täuelsizdigi men territoriyalıq twtastığı turasındağı sözderine abay boluın, eki el arasındağı berik dostıq pen ıntımaqtastıq prinsipterinen attap ketpeuin eskertti.

Bwl – Mäulen Äşimbaevtıñ Resey deputattarına qaratqan birinşi pikiri emes, ol kezinde Resey Parlament ökilderiniñ Qazaqstanmen ortaq parlament qwru, şekaranı ortaq qorğau sekildi jımısqı oylarına da batıl poziciya bildirgen azamat.

Aqtamberdi Aspan

“The Qazaq Times”