10 mausımda AQŞ prezidenti Donal'd Tramp pen Soltüstik Koreya basşısı Kim Joñ Un älem köz tikken Tramp-Kim kelissözin ötkizu üşin Singapurğa jetip, sol eldiñ ükimet basşılarımen jeke-jeke kezdesti. Eki eldiñ basşısı da Singapur tarabınıñ qonaqjaylığına oñ bağasın berdi. Bwl turalı CNN, BBC jäne VOA qatarlı älemdik ıqpaldı aqparat közderi habarladı. 

Jeksenbi küni Tramp otırğan AQŞ Äue küşteriniñ №1 wşağı Singapur äuejayına qondı. Singapurdıñ SİM basşısı Tramptı äuejaydan qarsı aldı. Alğaşqı kezdesulerde jurnalisterdiñ «Bwl retki kezdesu sätti bola ma?», «Köñil küyiñiz qalay?» degen saualdarına Tramp «Öte jaqsı» degen bir auız sözben jauap qaytardı. Degenmen, Singapur saparınan bwrın Tramp bwl kezdesudi «Boljausız keñistikke kiru» dep bağalağan edi.

Soltüstik Koreya basşısı jeksenbi küni tüsten keyin Singapurğa jetti. Kim Joñ Un da kelissözdiñ nätijeli bolatınına senim bildirdi. Singapurdıñ prem'er-ministri Kim Joñ Unmen kezdesu ötkizdi jäne Tramp-Kim sammiti üşin Singapur tarabı 20 mln AQŞ dolları qarjı bölgenin mälimdedi. Onıñ aytuınşa bwl halıqaralıq twraqtılıq pen senim üşin Singapurdıñ bildirgen «azğantay köñili» eken.

Al bügin, 11 mausım AQŞ pen Soltüstik Koreya lauazımdıları Singapurdağı alğaşqı kelissözderdi bastap ketti. Olar eki el basşılarınıñ bir künnen keyin ötetin kelissözderi üşin, taraptardıñ arasındağı pikir ayırmaşılığın azaytu maqsatında soñğı küş jigerin saldı. Degenmen, taraptardıñ kelissöz ökilderi bügingi kezdesu turalı jurnalisterge mälimet bermegen.

Al, Soltüstik Koreya tarabı resmi aqparat agenttigi kezekti kezdesuden keyin «Jaña däuir bastaladı» degen habar tarattı.

AQŞ-tıñ Singapurğa barğan ükimet lauazımdılarınıñ biri, Soltüstik Koreyanıñ yadrolıq qarulardı damıtudağı wzaq tarihınıñ bar ekenin eskere otırıp, AQŞ tarabı bwl kezdesuge optimistik közqarastı wstanıp otırğanın, kelissözdiñ sätti bolatınına senim bildire almaytının aytqan.

“The Qazaq Times”