10 ماۋسىمدا اقش پرەزيدەنتى دونالد ترامپ پەن سولتۇستىك كورەيا باسشىسى كيم جوڭ ۋن الەم كوز تىككەن ترامپ-كيم كەلىسسوزىن وتكىزۋ ءۇشىن سينگاپۋرعا جەتىپ، سول ەلدىڭ ۇكىمەت باسشىلارىمەن جەكە-جەكە كەزدەستى. ەكى ەلدىڭ باسشىسى دا سينگاپۋر تارابىنىڭ قوناقجايلىعىنا وڭ باعاسىن بەردى. بۇل تۋرالى CNN, BBC جانە VOA قاتارلى الەمدىك ىقپالدى اقپارات كوزدەرى حابارلادى. 

جەكسەنبى كۇنى ترامپ وتىرعان اقش اۋە كۇشتەرىنىڭ №1 ۇشاعى سينگاپۋر اۋەجايىنا قوندى. سينگاپۋردىڭ ءسىم باسشىسى ترامپتى اۋەجايدان قارسى الدى. العاشقى كەزدەسۋلەردە جۋرناليستەردىڭ «بۇل رەتكى كەزدەسۋ ءساتتى بولا ما؟»، «كوڭىل كۇيىڭىز قالاي؟» دەگەن ساۋالدارىنا ترامپ «وتە جاقسى» دەگەن ءبىر اۋىز سوزبەن جاۋاپ قايتاردى. دەگەنمەن، سينگاپۋر ساپارىنان بۇرىن ترامپ بۇل كەزدەسۋدى «بولجاۋسىز كەڭىستىككە كىرۋ» دەپ باعالاعان ەدى.

سولتۇستىك كورەيا باسشىسى جەكسەنبى كۇنى تۇستەن كەيىن سينگاپۋرعا جەتتى. كيم جوڭ ۋن دا كەلىسسوزدىڭ ناتيجەلى بولاتىنىنا سەنىم ءبىلدىردى. سينگاپۋردىڭ پرەمەر-ءمينيسترى كيم جوڭ ۋنمەن كەزدەسۋ وتكىزدى جانە ترامپ-كيم ءسامميتى ءۇشىن سينگاپۋر تارابى 20 ملن اقش دوللارى قارجى بولگەنىن مالىمدەدى. ونىڭ ايتۋىنشا بۇل حالىقارالىق تۇراقتىلىق پەن سەنىم ءۇشىن سينگاپۋردىڭ بىلدىرگەن «ازعانتاي كوڭىلى» ەكەن.

ال بۇگىن، 11 ماۋسىم اقش پەن سولتۇستىك كورەيا لاۋازىمدىلارى سينگاپۋرداعى العاشقى كەلىسسوزدەردى باستاپ كەتتى. ولار ەكى ەل باسشىلارىنىڭ ءبىر كۇننەن كەيىن وتەتىن كەلىسسوزدەرى ءۇشىن، تاراپتاردىڭ اراسىنداعى پىكىر ايىرماشىلىعىن ازايتۋ ماقساتىندا سوڭعى كۇش جىگەرىن سالدى. دەگەنمەن، تاراپتاردىڭ كەلىسسوز وكىلدەرى بۇگىنگى كەزدەسۋ تۋرالى جۋرناليستەرگە مالىمەت بەرمەگەن.

ال، سولتۇستىك كورەيا تارابى رەسمي اقپارات اگەنتتىگى كەزەكتى كەزدەسۋدەن كەيىن «جاڭا ءداۋىر باستالادى» دەگەن حابار تاراتتى.

اقش-تىڭ سينگاپۋرعا بارعان ۇكىمەت لاۋازىمدىلارىنىڭ ءبىرى، سولتۇستىك كورەيانىڭ يادرولىق قارۋلاردى دامىتۋداعى ۇزاق تاريحىنىڭ بار ەكەنىن ەسكەرە وتىرىپ، اقش تارابى بۇل كەزدەسۋگە وپتيميستىك كوزقاراستى ۇستانىپ وتىرعانىن، كەلىسسوزدىڭ ءساتتى بولاتىنىنا سەنىم بىلدىرە المايتىنىن ايتقان.

“The Qazaq Times”