Tramp avtoköligi. Foto: India Today.

AQŞ pen Soltüstik Koreya basşılarınıñ kezdesuiniñ dayındıq jwmıstarı qızu jürilip jatqan twsta, «Kim Joñ Unnıñ kezdesu kezindegi şığındarın kim moynına aladı» degen ıñğaysız swraq tudı.  The Washington Post basılımınıñ habarına qarağanda, Soltüstik Koreya tarabı ekonomikalıq sankciyalarğa baylanıstı memleket jağdayınıñ auır küyde ekenin alğa tartıp, kelissöz şığının qarsı taraptıñ öz üstine aluın talap etken.

Atalğan basılımnıñ habarına qarağanda, Kim kezdesu ötkizu üşin Singapurdıñ Sentoza aralındağı bes jwldızdı The Fullerton Hotel qonaq üyin körsetken. Alayda, älemge tanımal qonaq üydiñ prezidenttik bölmesi är täuligine 6 mıñ AQŞ dollar töleuine tura keledi.  2 mausımda AQŞ ükimetiniñ mälimdemeşisi Hizer Nauert (Heather Nauert) bwl şığındı AQŞ ükimeti moynına almaytının mälimdedi.

Kezdesu ötetin The Fullerton Hotel qonaq üyi. Foto: www.fullertonhotels.com.

AQŞ pen KHDR qarım-qatınasın zertteuşi Skot Sniderdiñ aytuınşa, Kim rejiminiñ bwnday talap qoyuı «sayqımazaq oyını». Olar kezdesude AQŞ-pen terezesiniñ teñ boluın qalaydı. Esteriñizde bolsa, Pioñçañ qısqı Olimpiadası kezinde Soltüstik Koreyadan barğan ökilder tobınıñ barlıq şığının Oñtüstik Koreya tarabı kötergen edi.

Japon ükimetiniñ lauazımdıları bwl turalı: «Olarğa tek üstel men orındıq qana kerek sekildi. Şın mänisinde eki taraptıñ sätti kelissözi üşin üstel-orındıq qana emes, basqan-twrğan ärbir qadamdı, barlıq qimıldarğa deyin köñil bölui kerek», – degen pikirlerin aytıp ülgirdi.

Şın mänisinde, älem köz tikken bwnday kelissözde kezdesudiñ qayda ötetini, eki tarap lideriniñ qay orında otıruı, qatarlarında kimderdiñ bolatını, kelissöz üstelinde qanşa adamnıñ otıratını, as mäzirinen tartıp özara qanday tartu-taralğı almasatını jäne şığındı qalay öteytinine deyin asa mañızdı. Qos taraptıñ da eñ aldımen oylastıratını da qauipsizdik mäselesi. Kezdesudi ötkizuşi bolıp otırğan Singapur jol qauipsizdigin öz jauapkerşiligine aldı. Al, kezdesudiñ jalpı barısında qos tarap liderleriniñ qauipsizdigin taraptar öz moynına aladı.

Tramp senimdi köliginde. Foto: Quora.

Tramp kezekti saparına öziniñ arnayı dayındıqtan ötken oqqağar qosının, sauıttı säuletti avtoköligin jäne arnayı tikwşağın da alıp barmaq. Al, Kim Joñ Un bolsa  2011 jıldan beri alğaş ret alısqa sapar şekkeli twr.

Osı jerde bir qızıqtı mälimetti ayta keteyik. Singapur basılımdarınıñ habarına qarağanda (The Straits Times), Soltüstik Koreya tarabı liderleriniñ kelissöz kezinde paydalanatın avtoköliginiñ AQŞ prezidentiniñ köliginen eş kem bolmauın talap etude. Singapurdan soğan layıqtı kölikti jalğa aluğa izdestiru üstinde eken. Alayda, qısqa uaqıt işinde Singapurdan Tramptıñ köligimen säuleti men aybını şendesetin köliktiñ tabıla qoyuı ekitalay. Üytkeni, älemdegi eñ quattı eldiñ prezidenti Tramp paydalanatın kölik – «The Beast» dep atalatın älemdegi eñ aldınğı sauıttı äri säuletti avtokölik. Atalğan köliktiñ salmağı 8 tonnadan asadı, wzındığı 5,5 metr. Esikteri 20 sm qalıñdıqtağı oq ötpeytin metalldan jasalğan bolsa, tereze äynekteriñ qalıñdıqtağı 12 sm etip jasalğan. Tek qana jasalu qwnınıñ özi 1,2 mln AQŞ dollarınan asadı.

Habarğa qarağanda Tramptıñ köligi älde qaşan Singapurğa jetkizilip bolğan. Foto: Quora.

Ötken aptada Singapurde ötken Aziya qorğanıs ökilderiniñ Shangri-La Dialogue sammitinde, sol eldiñ qorğanıs ministri söz arasında, Tramp pen Kim kezdesuine ketetin şığınnıñ az bölegin Singapur ükimetiniñ de bölisetinin ayttı. Biraq, qanşalıqtı qarajatın moynına alatının anıq aytpadı.

Tramptıñ älem elderiniñ liderlerimen kezdesu kezinde ötkizgen qatelikteri öte köp. Ol bwnday kezdesuler kezinde dağdılı salttarğa qattı köñil bölip ketpeydi. Al Soltüstik Koreya lauazımdıları kerisinşe, jol-joralğılarğa erekşe nazar audaradı. Olardıñ saltı boyınşa, lauazımı eñ joğarı adam zalğa eñ soñınan kirui, äri esikten eñ alıs orınğa barıp otıruı kerek. Älem nazarındağı osı kezdesudiñ sirä qanday bolatının, Kim men Tramptıñ qalay kezdesip, qanday mämilede bolatını bes künnen keyin belgili bolmaq.

“The Qazaq Times”