كيم كەزدەسۋگە ءمىنىپ بارۋعا ترامپتىڭ اۆتوكولىگىنە تەڭدەسەتىن كولىك ىزدەستىرۋدە

اقش پەن سولتۇستىك كورەيا باسشىلارىنىڭ كەزدەسۋىنىڭ دايىندىق جۇمىستارى قىزۋ ءجۇرىلىپ جاتقان تۇستا، «كيم جوڭ ۋننىڭ كەزدەسۋ كەزىندەگى شىعىندارىن كىم موينىنا الادى» دەگەن ىڭعايسىز سۇراق تۋدى.  The Washington Post باسىلىمىنىڭ حابارىنا قاراعاندا، سولتۇستىك كورەيا تارابى ەكونوميكالىق سانكتسيالارعا بايلانىستى مەملەكەت جاعدايىنىڭ اۋىر كۇيدە ەكەنىن العا تارتىپ، كەلىسسوز شىعىنىن قارسى تاراپتىڭ ءوز ۇستىنە الۋىن تالاپ ەتكەن.

اتالعان باسىلىمنىڭ حابارىنا قاراعاندا، كيم كەزدەسۋ وتكىزۋ ءۇشىن سينگاپۋردىڭ سەنتوزا ارالىنداعى بەس جۇلدىزدى The Fullerton Hotel قوناق ءۇيىن كورسەتكەن. الايدا، الەمگە تانىمال قوناق ءۇيدىڭ پرەزيدەنتتىك بولمەسى ءار تاۋلىگىنە 6 مىڭ اقش دوللار تولەۋىنە تۋرا كەلەدى.  2 ماۋسىمدا اقش ۇكىمەتىنىڭ مالىمدەمەشىسى حيزەر ناۋەرت (Heather Nauert) بۇل شىعىندى اقش ۇكىمەتى موينىنا المايتىنىن مالىمدەدى.

كەزدەسۋ وتەتىن The Fullerton Hotel قوناق ءۇيى. فوتو: www.fullertonhotels.com.

اقش پەن كحدر قارىم-قاتىناسىن زەرتتەۋشى سكوت سنيدەردىڭ ايتۋىنشا، كيم رەجيمىنىڭ بۇنداي تالاپ قويۋى «سايقىمازاق ويىنى». ولار كەزدەسۋدە اقش-پەن تەرەزەسىنىڭ تەڭ بولۋىن قالايدى. ەستەرىڭىزدە بولسا، پيوڭچاڭ قىسقى وليمپياداسى كەزىندە سولتۇستىك كورەيادان بارعان وكىلدەر توبىنىڭ بارلىق شىعىنىن وڭتۇستىك كورەيا تارابى كوتەرگەن ەدى.

جاپون ۇكىمەتىنىڭ لاۋازىمدىلارى بۇل تۋرالى: «ولارعا تەك ۇستەل مەن ورىندىق قانا كەرەك سەكىلدى. شىن مانىسىندە ەكى تاراپتىڭ ءساتتى كەلىسسوزى ءۇشىن ۇستەل-ورىندىق قانا ەمەس، باسقان-تۇرعان ءاربىر قادامدى، بارلىق قيمىلدارعا دەيىن كوڭىل ءبولۋى كەرەك»، – دەگەن پىكىرلەرىن ايتىپ ۇلگىردى.

شىن مانىسىندە، الەم كوز تىككەن بۇنداي كەلىسسوزدە كەزدەسۋدىڭ قايدا وتەتىنى، ەكى تاراپ ليدەرىنىڭ قاي ورىندا وتىرۋى، قاتارلارىندا كىمدەردىڭ بولاتىنى، كەلىسسوز ۇستەلىندە قانشا ادامنىڭ وتىراتىنى، اس مازىرىنەن تارتىپ ءوزارا قانداي تارتۋ-تارالعى الماساتىنى جانە شىعىندى قالاي وتەيتىنىنە دەيىن اسا ماڭىزدى. قوس تاراپتىڭ دا ەڭ الدىمەن ويلاستىراتىنى دا قاۋىپسىزدىك ماسەلەسى. كەزدەسۋدى وتكىزۋشى بولىپ وتىرعان سينگاپۋر جول قاۋىپسىزدىگىن ءوز جاۋاپكەرشىلىگىنە الدى. ال، كەزدەسۋدىڭ جالپى بارىسىندا قوس تاراپ ليدەرلەرىنىڭ قاۋىپسىزدىگىن تاراپتار ءوز موينىنا الادى.

ترامپ سەنىمدى كولىگىندە. فوتو: Quora.

ترامپ كەزەكتى ساپارىنا ءوزىنىڭ ارنايى دايىندىقتان وتكەن وققاعار قوسىنىن، ساۋىتتى ساۋلەتتى اۆتوكولىگىن جانە ارنايى تىكۇشاعىن دا الىپ بارماق. ال، كيم جوڭ ۋن بولسا  2011 جىلدان بەرى العاش رەت الىسقا ساپار شەككەلى تۇر.

وسى جەردە ءبىر قىزىقتى مالىمەتتى ايتا كەتەيىك. سينگاپۋر باسىلىمدارىنىڭ حابارىنا قاراعاندا (The Straits Times), سولتۇستىك كورەيا تارابى ليدەرلەرىنىڭ كەلىسسوز كەزىندە پايدالاناتىن اۆتوكولىگىنىڭ اقش پرەزيدەنتىنىڭ كولىگىنەن ەش كەم بولماۋىن تالاپ ەتۋدە. سينگاپۋردان سوعان لايىقتى كولىكتى جالعا الۋعا ىزدەستىرۋ ۇستىندە ەكەن. الايدا، قىسقا ۋاقىت ىشىندە سينگاپۋردان ترامپتىڭ كولىگىمەن ساۋلەتى مەن ايبىنى شەندەسەتىن كولىكتىڭ تابىلا قويۋى ەكىتالاي. ۇيتكەنى، الەمدەگى ەڭ قۋاتتى ەلدىڭ پرەزيدەنتى ترامپ پايدالاناتىن كولىك – «The Beast» دەپ اتالاتىن الەمدەگى ەڭ الدىنعى ساۋىتتى ءارى ساۋلەتتى اۆتوكولىك. اتالعان كولىكتىڭ سالماعى 8 توننادان اسادى، ۇزىندىعى 5,5 مەتر. ەسىكتەرى 20 سم قالىڭدىقتاعى وق وتپەيتىن مەتاللدان جاسالعان بولسا، تەرەزە اينەكتەرىڭ قالىڭدىقتاعى 12 سم ەتىپ جاسالعان. تەك قانا جاسالۋ قۇنىنىڭ ءوزى 1,2 ملن اقش دوللارىنان اسادى.

حابارعا قاراعاندا ترامپتىڭ كولىگى الدە قاشان سينگاپۋرعا جەتكىزىلىپ بولعان. فوتو: Quora.

وتكەن اپتادا سينگاپۋردە وتكەن ازيا قورعانىس وكىلدەرىنىڭ Shangri-La Dialogue سامميتىندە، سول ەلدىڭ قورعانىس ءمينيسترى ءسوز اراسىندا، ترامپ پەن كيم كەزدەسۋىنە كەتەتىن شىعىننىڭ از بولەگىن سينگاپۋر ۇكىمەتىنىڭ دە بولىسەتىنىن ايتتى. بىراق، قانشالىقتى قاراجاتىن موينىنا الاتىنىن انىق ايتپادى.

ترامپتىڭ الەم ەلدەرىنىڭ ليدەرلەرىمەن كەزدەسۋ كەزىندە وتكىزگەن قاتەلىكتەرى وتە كوپ. ول بۇنداي كەزدەسۋلەر كەزىندە داعدىلى سالتتارعا قاتتى كوڭىل ءبولىپ كەتپەيدى. ال سولتۇستىك كورەيا لاۋازىمدىلارى كەرىسىنشە، جول-جورالعىلارعا ەرەكشە نازار اۋدارادى. ولاردىڭ سالتى بويىنشا، لاۋازىمى ەڭ جوعارى ادام زالعا ەڭ سوڭىنان كىرۋى، ءارى ەسىكتەن ەڭ الىس ورىنعا بارىپ وتىرۋى كەرەك. الەم نازارىنداعى وسى كەزدەسۋدىڭ ءسىرا قانداي بولاتىنىن، كيم مەن ترامپتىڭ قالاي كەزدەسىپ، قانداي مامىلەدە بولاتىنى بەس كۇننەن كەيىن بەلگىلى بولماق.

“The Qazaq Times”