– Erik, oinet.kz aqparattıq-saraptamalıq saytına bas redaktor bolıp barıp jatır ekensiñ. Qwttı bolsın! Äueli osı oinet.kz aqparattıq-saraptamalıq saytı jaylı aytıp ötseñ. Qaşan qwrılğan, mazmwnı qanday?

– Rahmet, Ömirjan! Oinet.kz saytı aqparattıq agenttik retindegi kuälikti 2014 jılı alğan. Tirkelgen jeri – Almatı qalası. Aqparattıq-saraptamalıq dep atauı aytıp twrğanday, negizinen osı eki bağıtta jwmıs isteydi. Qazaq jäne orıs tilderinde şığadı. Qwrıltayşıları da «öz auılımızda» jürgen wltjandı azamattar. Jurnalistikanıñ ne ekenin menen artıq bilmese, kem bilmeydi.

Tirkelgenine eki jıldan endi assa da, saytımızdıñ täp-täuir tanımaldığı bar. Birqatar belgili portaldar Oinet.kz-de jariyalanğan materialdardı köşirip basadı. Onı öz mısalımnan bilemin. Bas redaktor bolıp kelmey twrğanda-aq Oynetke maqalalarım jariyalanıp twratın. Keybir jurnalister jeke özime habarlasıp, saytta jariyalanğan maqalamdı öz sayttarına köşirip basudı swraytın. Endigi meniñ moynıma artılğan mindet – sol tanımaldıqtı odan äri arttıru.

– Öziñdi qalıñ oqırman «Jas Alaş» gazeti arqılı biledi. Internet jurnalistikanıñ artıqşılığı, kemşiligi nede?

– Internet jurnalistikanıñ artıqşılığı onıñ operativtiliginde. Gazet bılay twrsın, internet jurnalistika qazir telearnanıñ da aldın orap ketti.

Köpşilik sayttar «aqparattıq-saraptamalıq» dep atalğanımen, qwrğaq aqparattı jarısa taratudan ärige asa almay jür. Saraptama joqtıñ qası. Äzirge men körgen kemşilik osı.

– Bas redaktor retinde oinet.kz-ke qanday özgerister jasau oyda bar? Josparıñ qanday?

– Bazarğa kelgen adam eñ aldımen ädemi närsege köz toqtatıp qaraydı. Odan keyin sapasın tekseredi. Wnatsa, satıp aladı. Wnamasa, basqasın izdeydi. Bwqaralıq aqparat qwralı da – tauar. Sondıqtan, eñ aldımen sayttıñ tür-kelbetine, odan keyin jariyalanatın materialdardıñ mazmwnına basa köñil bölemiz.

– Osı qazaq sayttarınıñ jii sınğa wşırap, mazmwn jağınan aqsap jatuınıñ sebebi nede dep oylaysıñ?

– Kör-jerdiñ bärin jaza bermey, jariyalanatın dünielerge talğammen qarasa jetkilikti.

-  oinet.kz özge aqparattıq sayttardan nesimen erekşelenedi? Sayttıñ öz jolın tabuda qanday qadamdar jasaladı?

– Saraptama men jurnalistik zertteuge köbirek köñil bölsek deymiz. Belgili sarapşılar men jurnalisterdi avtor retinde tartu oyda bar.

– Uaqıt tauıp, äñgimeleskeniñe rahmet!

Ömirjan Äbdihalıq

“The Qazaq Times”