Foto: worldbulletin.net

Atom energiyası jönindegi halıqaralıq agenttik (MAGATE), AQŞ-tıñ "Irannıñ yadrolıq kelisiminen" şıqqanına qaramastan, Iran 2015 jılğı sol kelisimşart arqılı bekitilgen şekteuler ayasında öziniñ yadrolıq bağdarlamasın saqtap otır, dep habarladı.

MAGATE-niñ mälimdemesine qarağanda, Iran urandı bayıtu bağdarlamasın toqtatpay, onı saqtauda. Irannıñ bayıtılğan uran qorı halıqaralıq kelisim boyınşa belgilengen şekte, yağni 300 kg. köleminde saqtaluda. Alayda, atalğan agenttik osı mälimdemesinen bölek, Irandı MAGATE-niñ qosımşa kelisimşartı ayasında jasalğan «qosımşa mümkindik» attı inspekciyasına kederi jasauda dep ayıptauda.

Esteriñizge salsaq, 2015 jılı Iran men "altılıq" (AQŞ, Franciya, Wlıbritaniya, Germaniya, Qıtay jäne Resey) elderi yadrolıq bağdarlama boyınşa tarihi kelisimşartqa qol qoyıp, nätijesinde Tehranğa (Tegeranğa) qatıstı sankciyalar jeñildetilgen edi. Sonımen qatar, Iran qaruğa qoldanılatın plutoniydi şığarmauğa, 15 jıl boyına 3,67%-ğa deyin bayıtılğan urannıñ 300 kg-nan aspaytın mölşerin wstauğa, yadrolıq nısandardı qayta jabdıqtap, olardı tek beybit maqsatta paydalanuğa mindet alğan bolatın. Al, bärimizge belgili, üstimizdegi jıldıñ 8 mamır küni AQŞ prezidenti Donal'd Tramp Irannıñ yadrolıq bağdarlamasınan şığatının jäne irandıq rejimge qarsı jaña sankciyalar salatının mälimdegen edi. Tramptıñ bwl şeşimine EO elderi men Resey qarsı şıqqan bolatın. Endi, MAGATE Irannıñ AQŞ-tıñ şeşimine qaramastan, sol kelisimşarttpen bekitilgen şarttardı jüzege asırıp otırğanın habarlauda.

“The Qazaq Times”