Foto: Körneki suret

Auğanstannıñ şekaralıq auıldarınıñ twrğındarı aymaqtağı qarulı qaqtığıstardıñ kesirinen üylerin jappay tastap ketuge mäjbür. «Azattıq» radiosınıñ türikmen qızmetiniñ habarlauınşa, bir ğana Kalayzal audanındağı 86 auıl qarulı toptıñ qorşauında qalğan. Bwl turalı jergilikti deputat Said Esedulla  Sadat mälimdegen.

«Talibandar Kalayzadağı 86 auıldı basıp aldı. Ol jerdegi ükimettik küşter Talibandar tarapınan ığıstırıluda», - dep habarlağan şeneunik.

Auğanstannıñ şekaralıq audandarındağı äskeriler säuir ayınıñ ortasında şabuılğa köşken. Sol uaqıttan beri  twrğındar twrğın üyleri men mal-mülikterin tastap ketuge mäjbür bolğan. Olardıñ arasında türikmenderdiñ sanı basım. Endi Auğanstan ükimeti äskeriler tarapınan jaulap alınğan auıl twrğındarın qauipsizdikpen jäne azıq-tülikpen qamtamasız ete almay otır.

12 mamır küni jüzdegen etnikalıq türikmen otbası Guraiş auılınıñ mañayına bas sauğalap barğan. Olardıñ kedeyşiliktiñ şegine jetip, işerge as taba almay jatqandarı turalı da aytıluda. «Azattıq» radiosınıñ Auğanstandağı tilşisi Şamerdanuglu Mıradınıñ habarlauınşa, Talibandar tarapınan basıp alınğan auıldar men basqa da qarulı toptardan qaşıp şıqqan adamdardıñ sanı turalı tipti ükimettiñ özi naqtı mälimet bere almaydı. «Bwnı tipti lager' dep te atay almaysıñ. Adamdar qara jerde, eşqanday tösenişsiz twrıp jatır. As-susız, kiim-keşeksiz, tipti bastarında baspanaları da joq. Olardıñ qanşası aştıq pen aurudan qaytıs bolatının Qwday bilsin. Qauipsizdik sebepberine baylanıstı olarğa ükimettik wyımdar da, halıqaralıq wyımdar da, onıñ işinde Qızıl Krest qoğamı da jaqınday almay otır» , - dedi Ş.Mıradı.

Eske salayıq, säuir ayınıñ basında «Taliban» qozğalısı köktemgi şabuıldıñ bastalğanı turalı habarlağan edi. Bwl jılı qarulı toptıñ äreketi «Handek» dep ataldı.

“The Qazaq Times”