مىڭداعان ەتنيكالىق تۇرىكمەن اۋعانستاننان ۇدەرە كوشۋدە

اۋعانستاننىڭ شەكارالىق اۋىلدارىنىڭ تۇرعىندارى ايماقتاعى قارۋلى قاقتىعىستاردىڭ كەسىرىنەن ۇيلەرىن جاپپاي تاستاپ كەتۋگە ءماجبۇر. «ازاتتىق» راديوسىنىڭ تۇرىكمەن قىزمەتىنىڭ حابارلاۋىنشا، ءبىر عانا كالايزال اۋدانىنداعى 86 اۋىل قارۋلى توپتىڭ قورشاۋىندا قالعان. بۇل تۋرالى جەرگىلىكتى دەپۋتات سايد ەسەدۋللا  سادات مالىمدەگەن.

«تاليباندار كالايزاداعى 86 اۋىلدى باسىپ الدى. ول جەردەگى ۇكىمەتتىك كۇشتەر تاليباندار تاراپىنان ىعىستىرىلۋدا»، - دەپ حابارلاعان شەنەۋنىك.

اۋعانستاننىڭ شەكارالىق اۋداندارىنداعى اسكەريلەر ءساۋىر ايىنىڭ ورتاسىندا شابۋىلعا كوشكەن. سول ۋاقىتتان بەرى  تۇرعىندار تۇرعىن ۇيلەرى مەن مال-مۇلىكتەرىن تاستاپ كەتۋگە ءماجبۇر بولعان. ولاردىڭ اراسىندا تۇرىكمەندەردىڭ سانى باسىم. ەندى اۋعانستان ۇكىمەتى اسكەريلەر تاراپىنان جاۋلاپ الىنعان اۋىل تۇرعىندارىن قاۋىپسىزدىكپەن جانە ازىق-تۇلىكپەن قامتاماسىز ەتە الماي وتىر.

12 مامىر كۇنى جۇزدەگەن ەتنيكالىق تۇرىكمەن وتباسى گۋرايش اۋىلىنىڭ ماڭايىنا باس ساۋعالاپ بارعان. ولاردىڭ كەدەيشىلىكتىڭ شەگىنە جەتىپ، ىشەرگە اس تابا الماي جاتقاندارى تۋرالى دا ايتىلۋدا. «ازاتتىق» راديوسىنىڭ اۋعانستانداعى ءتىلشىسى شامەردانۋگلۋ مىرادىنىڭ حابارلاۋىنشا، تاليباندار تاراپىنان باسىپ الىنعان اۋىلدار مەن باسقا دا قارۋلى توپتاردان قاشىپ شىققان ادامداردىڭ سانى تۋرالى ءتىپتى ۇكىمەتتىڭ ءوزى ناقتى مالىمەت بەرە المايدى. «بۇنى ءتىپتى لاگەر دەپ تە اتاي المايسىڭ. ادامدار قارا جەردە، ەشقانداي توسەنىشسىز تۇرىپ جاتىر. اس-سۋسىز، كيىم-كەشەكسىز، ءتىپتى باستارىندا باسپانالارى دا جوق. ولاردىڭ قانشاسى اشتىق پەن اۋرۋدان قايتىس بولاتىنىن قۇداي ءبىلسىن. قاۋىپسىزدىك سەبەپبەرىنە بايلانىستى ولارعا ۇكىمەتتىك ۇيىمدار دا، حالىقارالىق ۇيىمدار دا، ونىڭ ىشىندە قىزىل كرەست قوعامى دا جاقىنداي الماي وتىر» ، - دەدى ش.مىرادى.

ەسكە سالايىق، ءساۋىر ايىنىڭ باسىندا «تاليبان» قوزعالىسى كوكتەمگى شابۋىلدىڭ باستالعانى تۋرالى حابارلاعان ەدى. بۇل جىلى قارۋلى توپتىڭ ارەكەتى «حاندەك» دەپ اتالدى.

“The Qazaq Times”