Foto: euronews.com

Europa odağı Birikken Ştattardıñ Irannıñ yadrolıq kelisimşartınan şığu turalı şeşimine jauap dayındap jatır. Bwl turalı EO-nıñ AQŞ-tağı elşisi Devid O'Sallivan mälimdedi. Onıñ aytuınşa, Bryussel' jaqın künderi Iranmen seriktestik jasağandarı üşin Uaşington tarapınan sankciyağa wşırauı mümkin kompaniyaların qorğau maqsatında birqatar şaralar dayındauda.

«Biz AQŞ-tıñ europalıq kompaniyalarğa tağı da sankciya saluı mümkin ekenin esepke aluımız kerek», - dep mälimdedi O'Sallivan 14 mamır küni Uaşingtondağı analitikalıq ortalıqta söylegen sözinde. Onıñ aytuınşa, europalıq liderler atalğan mäselege baylanıstı «jaqın künderi» batıstıq kompaniya akcionerleri men seriktesterimen birqatar kezdesu ötkizbek. Odan bölek, EO-na müşe memleketter 17 mamır küni Bolgariyada ötetin EO-Balqan elderi sammitinde AQŞ-tıñ sankciyalarına qarsı jauaptar dayındamaq. O'Sallivannıñ sözinşe, olar sol sammitte Irandağı europalıq kompaniyalardıñ müddelerin saqtau üşin, sonımen qatar özderiniñ investiciyaların AQŞ-tıñ sankciyasınan qorğau maqsatında «kelisilgen jäne biregey sayasi şaralardı» jan-jaqtı qarastırmaq.

Eske salayıq, 8 mamır küni AQŞ prezidenti Donal'd Tramp 2015 jılı Iranmen jäne älemdik altı iri derjavamen jasalğan Irannıñ yadrolıq kelisimşarınan şığatını turalı jariyalağan edi.

“The Qazaq Times”