ەۋرووداق ترامپتىڭ شەشىمىنە قارسى جاۋاپ دايىندايتىنىن مالىمدەدى

ەۋروپا وداعى بىرىككەن شتاتتاردىڭ يراننىڭ يادرولىق كەلىسىمشارتىنان شىعۋ تۋرالى شەشىمىنە جاۋاپ دايىنداپ جاتىر. بۇل تۋرالى ەو-نىڭ اقش-تاعى ەلشىسى دەۆيد و'سالليۆان مالىمدەدى. ونىڭ ايتۋىنشا، بريۋسسەل جاقىن كۇندەرى يرانمەن سەرىكتەستىك جاساعاندارى ءۇشىن ۋاشينگتون تاراپىنان سانكتسياعا ۇشىراۋى مۇمكىن كومپانيالارىن قورعاۋ ماقساتىندا بىرقاتار شارالار دايىنداۋدا.

«ءبىز اقش-تىڭ ەۋروپالىق كومپانيالارعا تاعى دا سانكتسيا سالۋى مۇمكىن ەكەنىن ەسەپكە الۋىمىز كەرەك»، - دەپ مالىمدەدى و'سالليۆان 14 مامىر كۇنى ۋاشينگتونداعى اناليتيكالىق ورتالىقتا سويلەگەن سوزىندە. ونىڭ ايتۋىنشا، ەۋروپالىق ليدەرلەر اتالعان ماسەلەگە بايلانىستى «جاقىن كۇندەرى» باتىستىق كومپانيا اكتسيونەرلەرى مەن سەرىكتەستەرىمەن بىرقاتار كەزدەسۋ وتكىزبەك. ودان بولەك، ەو-نا مۇشە مەملەكەتتەر 17 مامىر كۇنى بولگاريادا وتەتىن ەو-بالقان ەلدەرى سامميتىندە اقش-تىڭ سانكتسيالارىنا قارسى جاۋاپتار دايىنداماق. و'سالليۆاننىڭ سوزىنشە، ولار سول سامميتتە يرانداعى ەۋروپالىق كومپانيالاردىڭ مۇددەلەرىن ساقتاۋ ءۇشىن، سونىمەن قاتار وزدەرىنىڭ ينۆەستيتسيالارىن اقش-تىڭ سانكتسياسىنان قورعاۋ ماقساتىندا «كەلىسىلگەن جانە بىرەگەي ساياسي شارالاردى» جان-جاقتى قاراستىرماق.

ەسكە سالايىق، 8 مامىر كۇنى اقش پرەزيدەنتى دونالد ترامپ 2015 جىلى يرانمەن جانە الەمدىك التى ءىرى دەرجاۆامەن جاسالعان يراننىڭ يادرولىق كەلىسىمشارىنان شىعاتىنى تۋرالى جاريالاعان ەدى.

“The Qazaq Times”