Ötken aptada "Qazpoşta" AQ basşıları hat tasitın drondardı sınaqtan ötkizip körgen edi. Osığan deyin 2 keli jükti äue arqılı tasımaldap kelgen olar, bwl jolı jük salmağın eseleudi közdep, kölemi ülken äue apparattarın kökke wşırğan. Alayda tıñnan türen salamız degenderdiñ talpınısı eş ketti. Dronnıñ äuege köterilgeni sol edi, qalbalaqtap wzaq wşpay qwlap qaldı.

Jurnalisterdi jiıp, tıñ ädisterin paş etpek bolğan "Qazpoşta" basşıları älgi oqiğadan keyin, betterinen monşaq tögilip, tömenşiktey berdi. Tipti, aralarında bwl "masqaranı" jariya qılmaudı ötingenderi de boldı-mıs.

Özge elderde mwnday täjiribie keñinen qoldanıladı degen bastamaşılar dronnıñ qwlauına ekpindey soqqan jel kedergi boldı degendi ayttı. Äytpese, qiırdan hat kütkenderge sälemdemelerdi uaqıtında jetkizer edik dep, mizbaqpay otır.

"Qazpoşta" jetekşileri drondı qoldanudağı oylarımen bölisti. Sözderinşe, şalğay auıldarda twratındarğa gazet-jurnal men hattı avtokölikpen tasu qiınğa soğadı eken. Özderinde bar kölikter tau-taspen jüre almaydı. Sondıqtan sälimdemelerdi äue arqılı jetkizudi wyğarğan. Onıñ üstine, bwl qızmet türi köp şığındı qajet etpeydi-mıs. Dronnıñ är şaqırımına nebäri 90 teñge töleymiz deydi. Bwl - kölikter men poyızdarğa ketetin şığınnan edäuir az eken.

Jä, dron arqılı hat tasu - arzan delik. Janarmay jaqpaydı, vagondarğa jük salu üşin aqı tölemeydi. Sälemdemeni wşu apparatına salıp, jetkize saladı. "Qaşpoşta" basşıları tap osılay sıñarjaq oylasa kerek. Olardıñ bwl äreketin basqaşa tüsindiru mümkin emes.

Sonşa nege tıraştanadı?

Tañdayı qızğanşa maqtap-madaqtap kelgen drondarı nebäri 70 şaqırım jerge ğana wşa aladı eken. Onı basqaru üşin keminde bir adam soñınan erip otıruı kerek. Jayau jürmesi anıq. İzinen kölikpen jürip otıradı. Temir twlpardı tizgindeytin tağı bir adam bar. Bälkim, drondı igeruge kömekşi de qajet şığar... Topşılay kelgende, keminde 3-4 adam hattardı äue arqılı jetkizu üşin jwmıladı. Kölikpen jürgen soñ, janarmayğa tağı şığın ketedi.  Sonda mwnıñ nesi ünem?

“The Qazaq Times”