وتكەن اپتادا "قازپوشتا" اق باسشىلارى حات تاسيتىن درونداردى سىناقتان وتكىزىپ كورگەن ەدى. وسىعان دەيىن 2 كەلى جۇكتى اۋە ارقىلى تاسىمالداپ كەلگەن ولار، بۇل جولى جۇك سالماعىن ەسەلەۋدى كوزدەپ، كولەمى ۇلكەن اۋە اپپاراتتارىن كوككە ۇشىرعان. الايدا تىڭنان تۇرەن سالامىز دەگەندەردىڭ تالپىنىسى ەش كەتتى. دروننىڭ اۋەگە كوتەرىلگەنى سول ەدى، قالبالاقتاپ ۇزاق ۇشپاي قۇلاپ قالدى.

جۋرناليستەردى جيىپ، تىڭ ادىستەرىن پاش ەتپەك بولعان "قازپوشتا" باسشىلارى الگى وقيعادان كەيىن، بەتتەرىنەن مونشاق توگىلىپ، تومەنشىكتەي بەردى. ءتىپتى، ارالارىندا بۇل "ماسقارانى" جاريا قىلماۋدى وتىنگەندەرى دە بولدى-مىس.

وزگە ەلدەردە مۇنداي تاجىريبيە كەڭىنەن قولدانىلادى دەگەن باستاماشىلار دروننىڭ قۇلاۋىنا ەكپىندەي سوققان جەل كەدەرگى بولدى دەگەندى ايتتى. ايتپەسە، قيىردان حات كۇتكەندەرگە سالەمدەمەلەردى ۋاقىتىندا جەتكىزەر ەدىك دەپ، مىزباقپاي وتىر.

"قازپوشتا" جەتەكشىلەرى دروندى قولدانۋداعى ويلارىمەن ءبولىستى. سوزدەرىنشە، شالعاي اۋىلداردا تۇراتىندارعا گازەت-جۋرنال مەن حاتتى اۆتوكولىكپەن تاسۋ قيىنعا سوعادى ەكەن. وزدەرىندە بار كولىكتەر تاۋ-تاسپەن جۇرە المايدى. سوندىقتان سالىمدەمەلەردى اۋە ارقىلى جەتكىزۋدى ۇيعارعان. ونىڭ ۇستىنە، بۇل قىزمەت ءتۇرى كوپ شىعىندى قاجەت ەتپەيدى-مىس. دروننىڭ ءار شاقىرىمىنا نەبارى 90 تەڭگە تولەيمىز دەيدى. بۇل - كولىكتەر مەن پويىزدارعا كەتەتىن شىعىننان ەداۋىر از ەكەن.

ءجا، درون ارقىلى حات تاسۋ - ارزان دەلىك. جانارماي جاقپايدى، ۆاگوندارعا جۇك سالۋ ءۇشىن اقى تولەمەيدى. سالەمدەمەنى ۇشۋ اپپاراتىنا سالىپ، جەتكىزە سالادى. "قاشپوشتا" باسشىلارى تاپ وسىلاي سىڭارجاق ويلاسا كەرەك. ولاردىڭ بۇل ارەكەتىن باسقاشا ءتۇسىندىرۋ مۇمكىن ەمەس.

سونشا نەگە تىراشتانادى؟

تاڭدايى قىزعانشا ماقتاپ-ماداقتاپ كەلگەن دروندارى نەبارى 70 شاقىرىم جەرگە عانا ۇشا الادى ەكەن. ونى باسقارۋ ءۇشىن كەمىندە ءبىر ادام سوڭىنان ەرىپ وتىرۋى كەرەك. جاياۋ جۇرمەسى انىق. ىزىنەن كولىكپەن ءجۇرىپ وتىرادى. تەمىر تۇلپاردى تىزگىندەيتىن تاعى ءبىر ادام بار. بالكىم، دروندى يگەرۋگە كومەكشى دە قاجەت شىعار... توپشىلاي كەلگەندە، كەمىندە 3-4 ادام حاتتاردى اۋە ارقىلى جەتكىزۋ ءۇشىن جۇمىلادى. كولىكپەن جۇرگەن سوڭ، جانارمايعا تاعى شىعىن كەتەدى.  سوندا مۇنىڭ نەسى ۇنەم؟

“The Qazaq Times”