Tramp Makronğa naqtı uäde bergen joq

AQŞ prezidenti Donal'd Tramp Iran yadrolıq mäselesinde Franciyamen kelisimge kele otırıp, ortaq mämile wsınuğa uäde berdi. Degenmen, Tramp 6 el qol qoyğan Iran yadrolıq kelisiminde qaluğa uäde bergen joq. Ol osığan deyin bwl kelisimdi Qwrama Ştat tarihındağı eñ «külkili», «naşar» kelisimderdiñ biri dep bağalap kelgen. Bwl turalı VOA aqparattıq saytı habarladı.

Tramp atalğan kelisimdi Aq üyde Franciya prezidenti Makronmen birge ötkizgen baspasöz konferenciyası kezinde tağı bir ret sınğa aldı. Onıñ aytuınşa bwl kelisim Irannıñ zımıran bağdarlamaların damıtuğa jol aşıp, aymaqtıñ twraqsızdığın örşite tüsedi.

AQŞ pen Franciya basşıları Iran mäselesi jöninde keñeytilgen kelissözder jürgizetinin mälimdedi. Degenmen, Tramptıñ altı el qol qoyğan Iran yadrolıq kelisiminen bas tartatını nemese kelisimde qalatını anıq emes. Seysenbi küni tüsten bwrın Tramp öz keñsesinde Franciya prezidentimen kezdesu kezinde, Iran ükimetine qatañ eskertu jasap: «Eger olar yadrolıq bağdarlamanı qayta qolğa alatın bolsa, bwrın-soñdı kezdespegen ülken problemağa tap boladı», – dedi.

Osıdan bwrınğı habarlarda, prezident Makron Tramptı Süriyadağı AQŞ äskerlerin jalğastı wstauğa keñes beretini turalı aytılğan. Sol arqılı Makron Başar Asad rejimi men Irannıñ Süriyanı tolıq baqılauına aluına jol bermeuin ümit etken. Sebebi, osıdan bwrın Tramp jurnalisterge bergen swhbatında, Süriyadağı AQŞ äskerlerin elge qaytaruğa tırısatının mälimdegen edi. Qazirgi kezde AQŞ-tıñ 2 mıñnan astam jauıngeri Süriyada «Islam memleketi» terrorlıq wyımına qarsı küresude.

Tramptıñ mälimetine qarağanda, Qwrama Ştat 18 jıldan beri Orta Şığısta 7 trillion AQŞ dolların jwmsağan jäne onıñ naqtı nätijesin köre alğan joq. Biraq ol sözinde: «Eger AQŞ qauipsizdikti saqtauğa aralaspağanda, Orta Şığıstağı keybir elder bir apta da aman twrmas edi. Endi bwl elder de küş jwmsauı kerek, äskerlerdi wstap twruğa jäne qarjılandıruğa üles qosuı kerek», – degen. Degenmen, Tramp naqtı bir elderdiñ atın atap aytqan joq.

“The Qazaq Times”