Foto: ru.euronews.com

"Ötken aptanıñ jwma küni Gaza sektorında bolğan qandı köterilisten keyin Izrail' men Türkiya bir-birine kinä artıp, tağı da egeske köşti", - dep habarlaydı  "euronews.com" aqparat agenttiginiñ orıs redakciyası.

Qolğa tüsken aqparattarğa qarağanda, Türkiya prezidenti Rejep Tayıp Erdoğan Izrail' ükimetin palestinalıqtarğa qarsı qaru qoldandı dep kinälağan. Ol Izrail' Qorğanıs küşteriniñ äreketin adamgerşilikke jatpaytın şabuıl jasadı dep ayıptap, olardı terrorist dep atadı. Sonıñ biri retinde, "Biz terroristerge qatıstı isti ünemi nazarda wstaymız, biraq bwl senderdiñ mindetteriñ emes. Sebebi, senderdiñ özderiñ terroristik memleket bolıp tabılasıñdar. Senderdiñ terroristik memleket retinde Gaza men Ierusalimdegi bılıqtarıñ bärine ayan" ,- degen sözin mısalğa keltiruge boladı.

Izrail' prem'er-ministri Ben'yamin Netan'hya ta ünsiz qalmadı. Ol bwğan jauap retinde, türikterdiñ äskeri äreketteri kezinde köptegen beybit twrğınnıñ qaza tapqandarına qatıstı Ankarağa ayıp tağılğanın eske salıp: "Erdoğanğa biraz närseni salmaqtap körgen dwrıs. Soltüstik Kiprdı basıp alıp, kürdterdiñ jerine basa-köktep kirip, Afrindegi beybit twrğındardı öltirgenderdiñ bizdi adamgerşilik pen ädepke qatıstı ayıptauğa qwqığı joq", - dep, tağı bir märte qaytaladı.

Esteriñizge sala ketsek, 30 naurız küni Palestina men Gaza sektorı şekarasındağı qarsılıq äreketi kezinde 17 adam qaza tapqan edi. Izrail' äskeri tek terrorlıq äreket wyımdastıruğa tırısıp, äskerilerge şabuıl jasağandarğa ğana oq jaudırdıq degenderinen qaytpauda. Al Euroodaq ötken jwmadağı osı oqiğağa qatıstı täuelsiz zertteu jürgizuge şaqıruda. Alayda Izrail' ükimeti bwl wsınıstan üzildi-kesildi bas tarttı.

“The Qazaq Times”