يزرايل مەن تۇركيا اراسىندا تاعى دا تەكەتىرەس باستالدى

"وتكەن اپتانىڭ جۇما كۇنى گازا سەكتورىندا بولعان قاندى كوتەرىلىستەن كەيىن يزرايل مەن تۇركيا ءبىر-بىرىنە كىنا ارتىپ، تاعى دا ەگەسكە كوشتى", - دەپ حابارلايدى  "euronews.com" اقپارات اگەنتتىگىنىڭ ورىس رەداكتسياسى.

قولعا تۇسكەن اقپاراتتارعا قاراعاندا، تۇركيا پرەزيدەنتى رەجەپ تايىپ ەردوعان يزرايل ۇكىمەتىن پالەستينالىقتارعا قارسى قارۋ قولداندى دەپ كىنالاعان. ول يزرايل قورعانىس كۇشتەرىنىڭ ارەكەتىن ادامگەرشىلىككە جاتپايتىن شابۋىل جاسادى دەپ ايىپتاپ، ولاردى تەرروريست دەپ اتادى. سونىڭ ءبىرى رەتىندە، ء"بىز تەرروريستەرگە قاتىستى ءىستى ۇنەمى نازاردا ۇستايمىز، بىراق بۇل سەندەردىڭ مىندەتتەرىڭ ەمەس. سەبەبى، سەندەردىڭ وزدەرىڭ تەرروريستىك مەملەكەت بولىپ تابىلاسىڭدار. سەندەردىڭ تەرروريستىك مەملەكەت رەتىندە گازا مەن يەرۋساليمدەگى بىلىقتارىڭ بارىنە ايان" ،- دەگەن ءسوزىن مىسالعا كەلتىرۋگە بولادى.

يزرايل پرەمەر-ءمينيسترى بەنيامين نەتانحيا تا ءۇنسىز قالمادى. ول بۇعان جاۋاپ رەتىندە، تۇرىكتەردىڭ اسكەري ارەكەتتەرى كەزىندە كوپتەگەن بەيبىت تۇرعىننىڭ قازا تاپقاندارىنا قاتىستى انكاراعا ايىپ تاعىلعانىن ەسكە سالىپ: "ەردوعانعا ءبىراز نارسەنى سالماقتاپ كورگەن دۇرىس. سولتۇستىك كيپردى باسىپ الىپ، كۇردتەردىڭ جەرىنە باسا-كوكتەپ كىرىپ، افريندەگى بەيبىت تۇرعىنداردى ولتىرگەندەردىڭ ءبىزدى ادامگەرشىلىك پەن ادەپكە قاتىستى ايىپتاۋعا قۇقىعى جوق", - دەپ، تاعى ءبىر مارتە قايتالادى.

ەستەرىڭىزگە سالا كەتسەك، 30 ناۋرىز كۇنى پالەستينا مەن گازا سەكتورى شەكاراسىنداعى قارسىلىق ارەكەتى كەزىندە 17 ادام قازا تاپقان ەدى. يزرايل اسكەرى تەك تەررورلىق ارەكەت ۇيىمداستىرۋعا تىرىسىپ، اسكەريلەرگە شابۋىل جاساعاندارعا عانا وق جاۋدىردىق دەگەندەرىنەن قايتپاۋدا. ال ەۋرووداق وتكەن جۇماداعى وسى وقيعاعا قاتىستى تاۋەلسىز زەرتتەۋ جۇرگىزۋگە شاقىرۋدا. الايدا يزرايل ۇكىمەتى بۇل ۇسىنىستان ءۇزىلدى-كەسىلدى باس تارتتى.

“The Qazaq Times”