Özbekstan İİM Taşkent qalası prokurorınıñ bwrınğı orınbasarı, 68 jastağı Miraglam Mirzaevqa (laqap atı «Antibiotik») qarsı qılmıstıq is qozğalğanın mälimdedi. Qılmıstıq is ayasında Mirzaevtıñ äyeli men wlı wstalğan, dep habarladı Ortalıq Aziya jañalıqtar qızmeti. 

İşki ister ministrliginiñ habarlauınşa, Wlttıq qauipsizdik qızmetiniñ Taşkent qalalıq basqarmasınıñ bölim basşısı, 42 jastağı Abduraşid Mirzaev (Miraglam Mirzaevtıñ wlı) jäne Taşkent qalası YUnusabad audanı Advokattar alqasınıñ törayımı Muhabbat Hasanova (Miraglam Mirzaevtıñ äyeli, laqap atı («Kardinal») wstalğan.

Miraglam Mirzaevtıñ körşisi 23 aqpanda üyine qara maska kigen bir top adam kirip, Mirzaevtıñ basına qap kigizip alıp ketkenin aytadı.

İİM mälimeti boyınşa, Miraglam Mirzaev pen onıñ äyeli Muhabbat Hasanova bwrınğı bas prokuror Raşid Kadırov isine baylanıstı wstalğan.

Bwrınğı bas prokurorğa qarsı qozğalğan qılmıstıq is ayasında onıñ orınbasarı bolğan, 45 jastağı Ulugbek Sunnatov pen ömirden ötken prezident Islam Karimovtiñ keñesşisi bolğan Jamşid Fayziev ta wstalğan.

Miraglam Mirzaev Özbekstan prokuraturasındağı eñ ıqpaldı adamdardıñ biri bolğan. Prezident Şavkat Mirziyaev küş qwrılımdarın sınğa alğannan keyin, ol birden qızmetinen alınğan.

“The Qazaq Times”