وزبەكستان ءىىم تاشكەنت قالاسى پروكۋرورىنىڭ بۇرىنعى ورىنباسارى، 68 جاستاعى ميراگلام ميرزاەۆقا (لاقاپ اتى «انتيبيوتيك») قارسى قىلمىستىق ءىس قوزعالعانىن مالىمدەدى. قىلمىستىق ءىس اياسىندا ميرزاەۆتىڭ ايەلى مەن ۇلى ۇستالعان، دەپ حابارلادى ورتالىق ازيا جاڭالىقتار قىزمەتى.
ىشكى ىستەر مينيسترلىگىنىڭ حابارلاۋىنشا، ۇلتتىق قاۋىپسىزدىك قىزمەتىنىڭ تاشكەنت قالالىق باسقارماسىنىڭ ءبولىم باسشىسى، 42 جاستاعى ابدۋراشيد ميرزاەۆ (ميراگلام ميرزاەۆتىڭ ۇلى) جانە تاشكەنت قالاسى يۋنۋساباد اۋدانى ادۆوكاتتار القاسىنىڭ ءتورايىمى مۋحاببات حاسانوۆا (ميراگلام ميرزاەۆتىڭ ايەلى، لاقاپ اتى («كاردينال») ۇستالعان.
ميراگلام ميرزاەۆتىڭ كورشىسى 23 اقپاندا ۇيىنە قارا ماسكا كيگەن ءبىر توپ ادام كىرىپ، ميرزاەۆتىڭ باسىنا قاپ كيگىزىپ الىپ كەتكەنىن ايتادى.
ءىىم مالىمەتى بويىنشا، ميراگلام ميرزاەۆ پەن ونىڭ ايەلى مۋحاببات حاسانوۆا بۇرىنعى باس پروكۋرور راشيد كادىروۆ ىسىنە بايلانىستى ۇستالعان.
بۇرىنعى باس پروكۋرورعا قارسى قوزعالعان قىلمىستىق ءىس اياسىندا ونىڭ ورىنباسارى بولعان، 45 جاستاعى ۋلۋگبەك سۋنناتوۆ پەن ومىردەن وتكەن پرەزيدەنت يسلام كاريموۆتىڭ كەڭەسشىسى بولعان جامشيد فايزيەۆ تا ۇستالعان.
ميراگلام ميرزاەۆ وزبەكستان پروكۋراتۋراسىنداعى ەڭ ىقپالدى ادامداردىڭ ءبىرى بولعان. پرەزيدەنت شاۆكات ميرزياەۆ كۇش قۇرىلىمدارىن سىنعا العاننان كەيىن، ول بىردەن قىزمەتىنەن الىنعان.
