Foto: Gazeta.uz

Özbekstan bas prokurorınıñ bwrınğı orınbasarı Wlıqbek Sunnatovqa qılmıstıq is qozğaldı. 45 jastağı polkovnikti prokuratura qızmetkerleri 24 aqpanda öz üyinde wstağan. Şeneunik tergeu swraqtarına jauap bere bastadı, dep habarladı Ortalıq Aziya jañalıqtar qızmeti. 

2017 jıldıñ ayağınan bastap Taşkent oblısınıñ prokurorı bolıp istegen Wlıqbek Sunnatov biıl 5 qañtarda "jwmıstağı öreskel qateligi üşin" prezident jarlığımen jwmıstan alınğan.

Bas prokuratura qızmetkeriniñ habarlauınşa, Sunnatov bwrınğı bas prokuror Raşid Kadırovqa qatıstı qozğalğan qılmıstıq is ayasında twtqındalğan. Kadırovtıñ wstalğanı 22 aqpanda belgili bolğan.

Derekköz mälimetine qarağanda, qazir Wlıqbek Sunnatovtı Bas prokuratura ğimaratında tergep jatır. Ol "qızmet babın asıra paydalanu" jäne "para alu" qılmıstarın jasadı degen küdikke ilikken.

Bwnımen qosa Sunnatov Özbekstan Wlttıq Paralimpiada qauımdastığı törağası qızmetinen bosatıldı.

“The Qazaq Times”