Foto: ForumDaily

AQŞ-tıñ Vice-ministri Mayk Penstıñ Izrail'ge resmi saparı ayaqtaldı. Ol Donal'd Tramptıñ Ierusalimdi Izrail'diñ astanası dep moyındağan mälimdemesin rastap, Amerika elşiligin Tel'-Avivten Ierusalimge köşiru jwmısı 2019 jıldıñ soñına qaray ayaqtalatının habarladı. Onıñ  AQŞ pen Izrail' qarım-qatınasınıñ tereñdigi jönindegi sözderi men iudaizm dinindegi qasietti orındardıñ biri Batıs qabırğağa (Western Wall) baruı mıñdağan palestinalıqtardıñ qala köşelerine şığıp, qarsılıq bildiruine wlastı. Bwl turalı AFP aqparattıq agenttigi jazdı. 

Palestinalıqtardıñ bir böligi Izrail'ge öter twstağı tekseru punktindegi qauipsizdik qızmetkerlerine tas laqtırıp, olar halıqqa qarsı  közden jas ağızatın gaz qoldandı. AFP tilşisi pikir alğan bir twrğın: "Halıqtıñ köşege şığuı eşteñe özgertpeydi. Tek dükender ğana jabılatın boldı", - dep, ümitsizdik tanıtqan.

Palestinanıñ Izrail'men aradağı wzaq jıldarğa sozılğan dauı eki tarap üşin de ädil şeşiletinine degen ümiti azayuğa negiz bar. Jaqın künderi Europa memleketteriniñ basşılarımen kezdesken Palestinanıñ Prezidenti Mahmwd Abbas olardan naqtı qoldau ala almadı. Al AQŞ-tıñ arnayı ökili Mayk Pens "Amerika men Izrail'diñ qarım-qatınası eşqaşan mwnday tereñ bolğan emes" degen jılı pikir bildirdi.

Palestina Ierusalimniñ şığıs böligin öziniñ bolaşaqta jariyalanatın memleketiniñ astanası dep esepteydi. Amerika öz kezeginde "Izrail' Ierusalimniñ joğarıda atalğan şığıs böligin zañsız okkupaciyalağan jäne bwl jer onıñ ieligi emes" degen twjırımğa senbeytinin tanıttı.

Ierusalim qalasınıñ statusı eki el arasındağı kelissöz nätijesinde anıqtalmağan. AQŞ onı Izrail'diñ astanası dep jariyalağan älemdegi alğaşqı memleket. Donal'd Tramptıñ bwl mälimdemesine mwsılman memleketterinen bastap, Euroodaq basşılarına deyin tügel qarsılıq bildirgen bolatın. Degenmen, onıñ Izrail' men Palestina qarım-qatınasına wsınğan özindik scenariine ayqın qarsılıq körsetip, tosqauıl boluğa tırısqan memleket äzirge körinbeydi.

“The Qazaq Times”