پالەستينالىقتار يزرايلگە قارسى شەرۋگە قايتا شىعا باستادى

اقش-تىڭ ۆيتسە-ءمينيسترى مايك پەنستىڭ يزرايلگە رەسمي ساپارى اياقتالدى. ول دونالد ترامپتىڭ يەرۋساليمدى ءيزرايلدىڭ استاناسى دەپ مويىنداعان مالىمدەمەسىن راستاپ، امەريكا ەلشىلىگىن تەل-اۆيۆتەن يەرۋساليمگە كوشىرۋ جۇمىسى 2019 جىلدىڭ سوڭىنا قاراي اياقتالاتىنىن حابارلادى. ونىڭ  اقش پەن يزرايل قارىم-قاتىناسىنىڭ تەرەڭدىگى جونىندەگى سوزدەرى مەن يۋدايزم دىنىندەگى قاسيەتتى ورىنداردىڭ ءبىرى باتىس قابىرعاعا (Western Wall) بارۋى مىڭداعان پالەستينالىقتاردىڭ قالا كوشەلەرىنە شىعىپ، قارسىلىق بىلدىرۋىنە ۇلاستى. بۇل تۋرالى AFP اقپاراتتىق اگەنتتىگى جازدى. 

پالەستينالىقتاردىڭ ءبىر بولىگى يزرايلگە وتەر تۇستاعى تەكسەرۋ پۋنكتىندەگى قاۋىپسىزدىك قىزمەتكەرلەرىنە تاس لاقتىرىپ، ولار حالىققا قارسى  كوزدەن جاس اعىزاتىن گاز قولداندى. AFP ءتىلشىسى پىكىر العان ءبىر تۇرعىن: "حالىقتىڭ كوشەگە شىعۋى ەشتەڭە وزگەرتپەيدى. تەك دۇكەندەر عانا جابىلاتىن بولدى", - دەپ، ۇمىتسىزدىك تانىتقان.

پالەستينانىڭ يزرايلمەن اراداعى ۇزاق جىلدارعا سوزىلعان داۋى ەكى تاراپ ءۇشىن دە ءادىل شەشىلەتىنىنە دەگەن ءۇمىتى ازايۋعا نەگىز بار. جاقىن كۇندەرى ەۋروپا مەملەكەتتەرىنىڭ باسشىلارىمەن كەزدەسكەن پالەستينانىڭ پرەزيدەنتى ماحمۇد ابباس ولاردان ناقتى قولداۋ الا المادى. ال اقش-تىڭ ارنايى وكىلى مايك پەنس "امەريكا مەن ءيزرايلدىڭ قارىم-قاتىناسى ەشقاشان مۇنداي تەرەڭ بولعان ەمەس" دەگەن جىلى پىكىر ءبىلدىردى.

پالەستينا يەرۋساليمنىڭ شىعىس بولىگىن ءوزىنىڭ بولاشاقتا جاريالاناتىن مەملەكەتىنىڭ استاناسى دەپ ەسەپتەيدى. امەريكا ءوز كەزەگىندە "يزرايل يەرۋساليمنىڭ جوعارىدا اتالعان شىعىس بولىگىن زاڭسىز وككۋپاتسيالاعان جانە بۇل جەر ونىڭ يەلىگى ەمەس" دەگەن تۇجىرىمعا سەنبەيتىنىن تانىتتى.

يەرۋساليم قالاسىنىڭ ستاتۋسى ەكى ەل اراسىنداعى كەلىسسوز ناتيجەسىندە انىقتالماعان. اقش ونى ءيزرايلدىڭ استاناسى دەپ جاريالاعان الەمدەگى العاشقى مەملەكەت. دونالد ترامپتىڭ بۇل مالىمدەمەسىنە مۇسىلمان مەملەكەتتەرىنەن باستاپ، ەۋرووداق باسشىلارىنا دەيىن تۇگەل قارسىلىق بىلدىرگەن بولاتىن. دەگەنمەن، ونىڭ يزرايل مەن پالەستينا قارىم-قاتىناسىنا ۇسىنعان وزىندىك ستسەناريىنە ايقىن قارسىلىق كورسەتىپ، توسقاۋىل بولۋعا تىرىسقان مەملەكەت ازىرگە كورىنبەيدى.

“The Qazaq Times”