Narazılıq şeruge şıqqandar qauipsizdik küşteri jağınan tosqauılğa wşıradı. Foto: TRT,

Iranda bolıp jatqan şerude 10 adam qaza taptı, onıñ bireui policiya qızmetkeri. Irannıñ ruhani kösemi Ayatolla Äli Hamaney jasağan mälimdemesinde narazılıq şaraların «Irannıñ jauları wyımdastırdı» degen pikir bildirdi. Europa Odağı, AQŞ, Izrail', Germaniya jäne Resey qatarlı elderi Irandağı jağdayğa pikir bildirdi.

«Türik Tele-Radio» qızmetiniñ saytında habarlauınşa, EO-nıñ Sırtqı qatınastar joğarı komissarı Federika Mogerini Irandağı jağdaydı baqılap otırğandarın, şeruge şıqqandardıñ qwqıqtarınıñ qorğalauın jäne söz bostandığın talap etkenin ayta kelip, şeruşilerdiñ talaptarına qoldau körsetetinin jetkizgen. Bwdan sırt, AQŞ prezidenti Donal'd Tramp ta ereuilşilerdi qoldaytının bildirdi jäne öziniñ Tvitter paraqşasında «Bwl Iran üşin özgeretin uaqıt» dep jazdı.

Izrail' ükimeti Irandağı ereuilşilerdi «batıl qadam jasauşılar» dep bağalasa, Germaniya jaq eldegi twraqsızdıqtıñ örşuinen alañdauda. Al Mäskeu biligi Iran rejimi jağında ekenin bildirip, şeteldik aralasulardıñ boluın qalamaytının jetkizdi.

«Pars Tudey» agenttiginiñ habarında eldiñ dini lideri Ayatolla Äli Hamaney: «Narazılıq şaralarınıñ artında Irannıñ jauları twr, olar Islam revolyuciyasınıñ ornığuın qalamaydı. Irandağı twraqsızdıqtı kütip otır. Olar halıqtı ükimetke qarsı qoyu üşin sayasi, ekonomikalıq, materialdıq jäne aqparattıq qoldau körsetip otır», - dedi.

Ötken aptanıñ beysenbi küni bastalğan narazılıq şaraları äli de jalğasın tabuda. Key qalalarda şeruşiler men qauipsizdik küşteri arasında atıs ta orın aldı. Mälimetterge qarağanda äzirge deyin 500-ge juıq azamat twtqındalğan.

“The Qazaq Times”