يراندا بولىپ جاتقان شەرۋدە 10 ادام قازا تاپتى، ونىڭ بىرەۋى پوليتسيا قىزمەتكەرى. يراننىڭ رۋحاني كوسەمى اياتوللا ءالي حامانەي جاساعان مالىمدەمەسىندە نارازىلىق شارالارىن «يراننىڭ جاۋلارى ۇيىمداستىردى» دەگەن پىكىر ءبىلدىردى. ەۋروپا وداعى، اقش، يزرايل، گەرمانيا جانە رەسەي قاتارلى ەلدەرى يرانداعى جاعدايعا پىكىر ءبىلدىردى.

«تۇرىك تەلە-راديو» قىزمەتىنىڭ سايتىندا حابارلاۋىنشا، ەو-نىڭ سىرتقى قاتىناستار جوعارى كوميسسارى فەدەريكا موگەريني يرانداعى جاعدايدى باقىلاپ وتىرعاندارىن، شەرۋگە شىققانداردىڭ قۇقىقتارىنىڭ قورعالاۋىن جانە ءسوز بوستاندىعىن تالاپ ەتكەنىن ايتا كەلىپ، شەرۋشىلەردىڭ تالاپتارىنا قولداۋ كورسەتەتىنىن جەتكىزگەن. بۇدان سىرت، اقش پرەزيدەنتى دونالد ترامپ تا ەرەۋىلشىلەردى قولدايتىنىن ءبىلدىردى جانە ءوزىنىڭ تۆيتتەر پاراقشاسىندا «بۇل يران ءۇشىن وزگەرەتىن ۋاقىت» دەپ جازدى.

يزرايل ۇكىمەتى يرانداعى ەرەۋىلشىلەردى «باتىل قادام جاساۋشىلار» دەپ باعالاسا، گەرمانيا جاق ەلدەگى تۇراقسىزدىقتىڭ ورشۋىنەن الاڭداۋدا. ال ماسكەۋ بيلىگى يران رەجيمى جاعىندا ەكەنىن ءبىلدىرىپ، شەتەلدىك ارالاسۋلاردىڭ بولۋىن قالامايتىنىن جەتكىزدى.

«پارس تۋدەي» اگەنتتىگىنىڭ حابارىندا ەلدىڭ ءدىني ليدەرى اياتوللا ءالي حامانەي: «نارازىلىق شارالارىنىڭ ارتىندا يراننىڭ جاۋلارى تۇر، ولار يسلام رەۆوليۋتسياسىنىڭ ورنىعۋىن قالامايدى. يرانداعى تۇراقسىزدىقتى كۇتىپ وتىر. ولار حالىقتى ۇكىمەتكە قارسى قويۋ ءۇشىن ساياسي، ەكونوميكالىق، ماتەريالدىق جانە اقپاراتتىق قولداۋ كورسەتىپ وتىر»، - دەدى.

وتكەن اپتانىڭ بەيسەنبى كۇنى باستالعان نارازىلىق شارالارى ءالى دە جالعاسىن تابۋدا. كەي قالالاردا شەرۋشىلەر مەن قاۋىپسىزدىك كۇشتەرى اراسىندا اتىس تا ورىن الدى. مالىمەتتەرگە قاراعاندا ازىرگە دەيىن 500-گە جۋىق ازامات تۇتقىندالعان.

“The Qazaq Times”