BWW BAs Assambleyasınıñ Ierusalim statusına qatıstı rezolyuciyasına dauıs beru. Foto BWW-nıñ resmi saytınan alındı

Birikken Wlttar Wyımınıñ Bas assambleyası AQŞ-tıñ Ierusalimdi Izrail astanası dep moyındau turalı şeşimine qarsı rezolyuciyanı qabıldadı. Bwl turalı BWW-nıñ jañalıqtar ortalığınan habarlandı. 

Jalpı BWW-nıñ şwğıl kezdesuinde 128 memleket Ierusalimdi Izrail'diñ astanası retinde  tanuğa qarsı bolsa, 35 memleket qalıs qaldı, 9 el AQŞ şeşimin qoldağan.

Sonımen BWW rezolyuciyasına qarsı şıqqan elder mınalar: AQŞ, Izrail', Gvatemala, Gonduras, Marşal araldarı, Mikroneziya, Nauru, Palau, Togo. Bwl elderdiñ barlığı Ierusalimdi Izrail' astanası dep moyındap otır.

Al Kanada, Meksika, Argentina, Rumıniya, Latviya, Horvatiya jäne tağı basqa da AQŞ-pen dostas elder beytarap poziciyanı tañdağan. Al 20 el dauıs beruge qatıspağan.

"Qasietti Ierusalimniñ sipatın, märtebesin jäne demografiyalıq qwramın özgertudi közdeytin kez kelgen şeşimder men is-äreketterdiñ zañdı küşi joq jäne ol joyıluı kerek", - delingen qabıldanğan rezolyuciya mätininde.

Osılayşa BWW Bas assambleyası memleketterdi Ierusalimde diplomatiyalıq orındarın aşpauğa şaqırdı.

Ayta keteyik, 18 jeltoqsan küni AQŞ-tıñ BWW-dağı ökili Nikki Heyli BWW Qauipsizdik Keñesiniñ "Donal'd Tramptıñ Ierusalimdi Izrail'diñ astanası dep moyındau turalı şeşimin toqtatu turalı" rezolyuciyasına veto qoyğan bolatın. Al Donal'd Tramp 6 jeltoqsan küni Ierusalimdi Izrail'diñ astanası dep jariyaladı. Izrail' mwnı jılı qabıldağanmen, Arab basşıları men Palestina "bwl äreket mwsılmandarğa qatıstı jasalğan eñ ülken provokaciya" dedi.

“The Qazaq Times”