Foto: tvc.ru

AQŞ Prezidenti Donal'd Tramp jariyalağan jaña Wlttıq qauipsizdik strategiyasında  Resey men Qıtay Amerikanıñ älemdegi ekonomikalıq basımdığına bastı qauip töndiruşi memleketter esebinde körsetilgen. Uaşingtondağı Ronal'd Reygan atındağı ğimarattıñ aldında twrıp söz söylegen Prezident özinen bwrınğı Aq üy äkimşilikteriniñ sırtqı sayasattağı qatelikterine toqtalıp, Päkistan men Soltüstik Koreyanıñ äreketterin sınğa aldı. Bwl turalı VVS jäne AFP aqparattıq agenttigi jazdı. 

"Amerika bäsekelestiktiñ jaña däuirine bet tüzedi. Resey men Qıtay bizge negizgi qarsılas küşter, degenmen olarmen jaqsı qarım-qatınastı saqtau kerek", - degen Donal'd Tramp Vladimir Putinniñ Reseydegi boljaldı terrorlıq akti turalı aqparattı tekseruge AQŞ-tıñ Ortalıq barlau basqarması kömekteskeni üşin arnayı alğıs bildirip, qoñırau şalğanın mısalğa keltirdi.

Jaña strategiyada Prezident AQŞ-tıñ qauipsizdiginde tört mañızdı bağıttı atap körsetken: territoriyalıq qauipsizdik, ekonomikalıq örleu, Amerikanıñ älemdegi ıqpalın arttıru, memlekettiñ qorğanıs qabiletin beybitşilikti saqtay otırıp küşeytu .

Alpıs segiz betten twratın qwjattı dayındau jwmıstarına Aq üy qızmetkerleri osıdan 11 ay bwrın kirisken. Wlttıq qauipsizdik strategiyası Donal'd Tramptıñ saylaualdı kampaniyası kezinde halıqqa bergen uädelerin orındauğa bağıttalğan.

Öziniñ bir jılğa juıq uaqıt işindegi qızmetine toqtalğan ol qısqa merzim işinde älem Amerikanıñ qaytadan mıqtı qalpında oralğanına birneşe ret kuä bolğanın jetkizdi. "2016 jılı mağan dauıs bergen kezde halıq Amerikanı qaytadan wlı etudi tañdadı", - dedi Tramp. Amerikanıñ älemdi dürliktirgen mälimdemelerine ol Parij klimattıq kelisimi jäne Trans-Tınıq mwhittıq äriptestik sauda kelisiminen şığuın atap ötti.

Özinen bwrınğı Amerika basşıları AQŞ-tıñ tağdırın baqılaudan şığarıp alğanın aytqan Donal'd Tramp, Soltüstik Koreyanı zımıran sınaqtarın doğarmağanı, al Päkistandı ekstremisterge qarsı küreske üles qospay otırğanı üşin ayıptadı.

“The Qazaq Times”