فوتو: tvc.ru

اقش پرەزيدەنتى دونالد ترامپ جاريالاعان جاڭا ۇلتتىق قاۋىپسىزدىك ستراتەگياسىندا  رەسەي مەن قىتاي امەريكانىڭ الەمدەگى ەكونوميكالىق باسىمدىعىنا باستى قاۋىپ ءتوندىرۋشى مەملەكەتتەر ەسەبىندە كورسەتىلگەن. ۋاشينگتونداعى رونالد رەيگان اتىنداعى عيماراتتىڭ الدىندا تۇرىپ ءسوز سويلەگەن پرەزيدەنت وزىنەن بۇرىنعى اق ءۇي اكىمشىلىكتەرىنىڭ سىرتقى ساياساتتاعى قاتەلىكتەرىنە توقتالىپ، پاكىستان مەن سولتۇستىك كورەيانىڭ ارەكەتتەرىن سىنعا الدى. بۇل تۋرالى ۆۆس جانە AFP اقپاراتتىق اگەنتتىگى جازدى. 

"امەريكا باسەكەلەستىكتىڭ جاڭا داۋىرىنە بەت تۇزەدى. رەسەي مەن قىتاي بىزگە نەگىزگى قارسىلاس كۇشتەر، دەگەنمەن ولارمەن جاقسى قارىم-قاتىناستى ساقتاۋ كەرەك", - دەگەن دونالد ترامپ ۆلاديمير ءپۋتيننىڭ رەسەيدەگى بولجالدى تەررورلىق اكتى تۋرالى اقپاراتتى تەكسەرۋگە اقش-تىڭ ورتالىق بارلاۋ باسقارماسى كومەكتەسكەنى ءۇشىن ارنايى العىس ءبىلدىرىپ، قوڭىراۋ شالعانىن مىسالعا كەلتىردى.

جاڭا ستراتەگيادا پرەزيدەنت اقش-تىڭ قاۋىپسىزدىگىندە ءتورت ماڭىزدى باعىتتى اتاپ كورسەتكەن: تەرريتوريالىق قاۋىپسىزدىك، ەكونوميكالىق ورلەۋ، امەريكانىڭ الەمدەگى ىقپالىن ارتتىرۋ، مەملەكەتتىڭ قورعانىس قابىلەتىن بەيبىتشىلىكتى ساقتاي وتىرىپ كۇشەيتۋ .

الپىس سەگىز بەتتەن تۇراتىن قۇجاتتى دايىنداۋ جۇمىستارىنا اق ءۇي قىزمەتكەرلەرى وسىدان 11 اي بۇرىن كىرىسكەن. ۇلتتىق قاۋىپسىزدىك ستراتەگياسى دونالد ترامپتىڭ سايلاۋالدى كامپانياسى كەزىندە حالىققا بەرگەن ۋادەلەرىن ورىنداۋعا باعىتتالعان.

ءوزىنىڭ ءبىر جىلعا جۋىق ۋاقىت ىشىندەگى قىزمەتىنە توقتالعان ول قىسقا مەرزىم ىشىندە الەم امەريكانىڭ قايتادان مىقتى قالپىندا ورالعانىنا بىرنەشە رەت كۋا بولعانىن جەتكىزدى. "2016 جىلى ماعان داۋىس بەرگەن كەزدە حالىق امەريكانى قايتادان ۇلى ەتۋدى تاڭدادى", - دەدى ترامپ. امەريكانىڭ الەمدى دۇرلىكتىرگەن مالىمدەمەلەرىنە ول پاريج كليماتتىق كەلىسىمى جانە ترانس-تىنىق مۇحيتتىق ارىپتەستىك ساۋدا كەلىسىمىنەن شىعۋىن اتاپ ءوتتى.

وزىنەن بۇرىنعى امەريكا باسشىلارى اقش-تىڭ تاعدىرىن باقىلاۋدان شىعارىپ العانىن ايتقان دونالد ترامپ، سولتۇستىك كورەيانى زىمىران سىناقتارىن دوعارماعانى، ال پاكىستاندى ەكسترەميستەرگە قارسى كۇرەسكە ۇلەس قوسپاي وتىرعانى ءۇشىن ايىپتادى.

“The Qazaq Times”