Foto: 360tv.ru

Reseydiñ zañ şığaruşı ökilderi AQŞ-tıñ bwqaralıq aqparat qwraldarın "şeteldik agent" dep tirkeu turalı wsınıs jasadı. Olar jaña wsınıstıñ kelesi aptada öz küşine engenin qalaydı. Osığan deyin Amerikadağı Reseydiñ memlekettik Russia Today (RT) telearnasınıñ  Uaşington tarapınan "şeteldik agent" türinde tirkelui talap etildi. Mäskeudiñ bwl äreketke jauap retinde naurız ayında bolatın Prezidenttik saylau qarsañında qolğa alatın şarası Resey men AQŞ qarım-qatınasına aytarlıqtay sızat tüsirui mümkin. Bwl turalı APF aqparattıq agenttigi jazdı. 

Memlekettik Duma ökili Vyaçeslav Volodinniñ aytuınşa, jaña talaptar CNN jäne Voice of America siyaqtı Reseyde jwmıs isteytin amerikalıq BAQ-qa äser etui mümkin. Sonday-aq bwl aqparat közderi özderiniñ äleumettik jelidegi paraqşalarında jariyalanımdar jasap otıratındıqtan, Facebook, Twitter, t.b.  äleumettik jeli kompaniyaları da "şeteldik agent" esebinde tirkelui qajet boluı mümkin.

Uaşington öziniñ Russia Today (RT) telearnasın "şeteldik agent" retinde tirkeuin  Resey BAQ-tarınan keletin jalğan aqparatpen küresu jäne şeteldik basılımdardıñ AQŞ-tıñ işki sayasatına aralasuına tosqauıl qoyu maqsatında dep tüsindirdi. Vyaçeslav Volodin "AQŞ älemniñ özge elderindegi söz bostandığı üşin bel şeşip küreskenimen, öz elinde bwl qwqıqtıñ bwzıluına köz jwmıp qaraydı", - deydi. Şeneuniktiñ pikirinşe, AQŞ azamattıq qwqıqtar men bostandıqtardı bwzıp otır. Reseydiñ wstanımı boyınşa AQŞ onıñ BAQ qwraldarına qanday şekteuler qoysa, Mäskeu amerikalıq aqparat ökilderine qatıstı däl sol qatañ talaptardı paydalanatın boladı.

Qırküyek ayında Russia Today (RT) telearnasın Kreml'diñ propagandalıq qaruı dep esepteytin Uaşington, aqparat qwralınan şeteldik özge sayasi müddelerdi qorğaytın zañgerler men lobbisterge arnalğan "Şeteldik agent turalı" zañğa säykes tirkeluin talap etken bolatın. Telearna basşısı Margarita Simonyan bwl turalı Resey Prezidenti Vladimir Putinge "Russia Today (RT)  jäne Sputnik telearnaları AQŞ tarapınan qısımğa wşırap jatır" dep habarlağan. Memleket basşısı: "Biz özimidiñ aqparat qwraldarımızğa şekteu qoyılğanı rastalğan boyda, jauap qatamız", - degen edi.

2012 jılı Reseyde şetelden qarjılandırılatın ükimettik emes wyımdardıñ "şeteldik agent" esebinde tirkeluin talap etetin zañ qabıldanğan bolatın. Endi atalğan zañğa aqparat qwraldarı da engizilmek.

“The Qazaq Times”