فوتو: 360tv.ru

رەسەيدىڭ زاڭ شىعارۋشى وكىلدەرى اقش-تىڭ بۇقارالىق اقپارات قۇرالدارىن "شەتەلدىك اگەنت" دەپ تىركەۋ تۋرالى ۇسىنىس جاسادى. ولار جاڭا ۇسىنىستىڭ كەلەسى اپتادا ءوز كۇشىنە ەنگەنىن قالايدى. وسىعان دەيىن امەريكاداعى رەسەيدىڭ مەملەكەتتىك Russia Today (RT) تەلەارناسىنىڭ  ۋاشينگتون تاراپىنان "شەتەلدىك اگەنت" تۇرىندە تىركەلۋى تالاپ ەتىلدى. ماسكەۋدىڭ بۇل ارەكەتكە جاۋاپ رەتىندە ناۋرىز ايىندا بولاتىن پرەزيدەنتتىك سايلاۋ قارساڭىندا قولعا الاتىن شاراسى رەسەي مەن اقش قارىم-قاتىناسىنا ايتارلىقتاي سىزات ءتۇسىرۋى مۇمكىن. بۇل تۋرالى APF اقپاراتتىق اگەنتتىگى جازدى. 

مەملەكەتتىك دۋما وكىلى ۆياچەسلاۆ ءۆولوديننىڭ ايتۋىنشا، جاڭا تالاپتار CNN جانە Voice of America سياقتى رەسەيدە جۇمىس ىستەيتىن امەريكالىق باق-قا اسەر ەتۋى مۇمكىن. سونداي-اق بۇل اقپارات كوزدەرى وزدەرىنىڭ الەۋمەتتىك جەلىدەگى پاراقشالارىندا جاريالانىمدار جاساپ وتىراتىندىقتان، Facebook, Twitter, ت.ب.  الەۋمەتتىك جەلى كومپانيالارى دا "شەتەلدىك اگەنت" ەسەبىندە تىركەلۋى قاجەت بولۋى مۇمكىن.

ۋاشينگتون ءوزىنىڭ Russia Today (RT) تەلەارناسىن "شەتەلدىك اگەنت" رەتىندە تىركەۋىن  رەسەي باق-تارىنان كەلەتىن جالعان اقپاراتپەن كۇرەسۋ جانە شەتەلدىك باسىلىمداردىڭ اقش-تىڭ ىشكى ساياساتىنا ارالاسۋىنا توسقاۋىل قويۋ ماقساتىندا دەپ ءتۇسىندىردى. ۆياچەسلاۆ ۆولودين "اقش الەمنىڭ وزگە ەلدەرىندەگى ءسوز بوستاندىعى ءۇشىن بەل شەشىپ كۇرەسكەنىمەن، ءوز ەلىندە بۇل قۇقىقتىڭ بۇزىلۋىنا كوز جۇمىپ قارايدى", - دەيدى. شەنەۋنىكتىڭ پىكىرىنشە، اقش ازاماتتىق قۇقىقتار مەن بوستاندىقتاردى بۇزىپ وتىر. رەسەيدىڭ ۇستانىمى بويىنشا اقش ونىڭ باق قۇرالدارىنا قانداي شەكتەۋلەر قويسا، ماسكەۋ امەريكالىق اقپارات وكىلدەرىنە قاتىستى ءدال سول قاتاڭ تالاپتاردى پايدالاناتىن بولادى.

قىركۇيەك ايىندا Russia Today (RT) تەلەارناسىن كرەملدىڭ پروپاگاندالىق قارۋى دەپ ەسەپتەيتىن ۋاشينگتون، اقپارات قۇرالىنان شەتەلدىك وزگە ساياسي مۇددەلەردى قورعايتىن زاڭگەرلەر مەن لوببيستەرگە ارنالعان "شەتەلدىك اگەنت تۋرالى" زاڭعا سايكەس تىركەلۋىن تالاپ ەتكەن بولاتىن. تەلەارنا باسشىسى مارگاريتا سيمونيان بۇل تۋرالى رەسەي پرەزيدەنتى ۆلاديمير پۋتينگە "Russia Today (RT)  جانە سپۋتنيك تەلەارنالارى اقش تاراپىنان قىسىمعا ۇشىراپ جاتىر" دەپ حابارلاعان. مەملەكەت باسشىسى: ء"بىز ءوزىمىدىڭ اقپارات قۇرالدارىمىزعا شەكتەۋ قويىلعانى راستالعان بويدا، جاۋاپ قاتامىز", - دەگەن ەدى.

2012 جىلى رەسەيدە شەتەلدەن قارجىلاندىرىلاتىن ۇكىمەتتىك ەمەس ۇيىمداردىڭ "شەتەلدىك اگەنت" ەسەبىندە تىركەلۋىن تالاپ ەتەتىن زاڭ قابىلدانعان بولاتىن. ەندى اتالعان زاڭعا اقپارات قۇرالدارى دا ەنگىزىلمەك.

“The Qazaq Times”